भांगरभूंय | प्रतिनिधी
फा टल्याच सप्तकांत आमी संवसारीक फार्मासिस्ट दीस मनयलो. ते निमतान देशभर उमेदीन कार्यावळी जाल्यो. फार्मसिस्टाचे म्हत्व आमकां दुयेंत पडटकच कळटा. कोरोना काळांत तें सगळ्यांक कळ्ळें. त्या काळांत रात दीस ह्या लोकांनींच काम केलें हें कोण विसरतलो ? हे खातीर तांचो सत्कारुय कांय लोकांनी केलो. आमच्या गोंयांत फार्मसी शिक्षण घेवपाची सोय पुर्तुगेज काळा सावन आसा. म्हळ्यार हो फांटो कितलो म्हत्वाचो तें कळटा. आतां फर्मागुडयेर फार्मसी कॉलेज सुरु जाल्ल्या कारणान उमेदवारांची बरी तजवीज जाल्या हें आमी मान्य करपाक जाय. गोंयांत पर्यटना फाटोफाट हो फाटो चड रोजगार दिता, हाका लागून तो उमेदवाराचे पसंतीचो आसता. तातूंत वचपाक विज्ञान फाट्याचें शिक्षण गरजेचें. ह्या फाट्यांत गेल्लो उमेदवार स्वताची फार्मसी ना जाल्यार प्रयोगशाळा वा वखदाच्या कंपनींनी काम करूं शकता. आमच्या भलायकेचे बाबतींत दोतोरा सारकोच फार्मासिस्ट उबो आसता.
फार्मसिस्ट दीस 25 सप्टेंबराकुच कित्याक मनयतात ? हें आमी पयलीं जाणून घेवया. देशातली भलायकी बरी दवरपाक इस्ताम्बूल तुर्की हांगां इंटरनँशनल फार्मास्युटिकल फेडरेशन काँग्रेस हांणी 2009 सालांत हे तारखेक वर्सुकी फार्मासिस्ट दीस मनोवपाचें थारलें. दर वर्सा नवी थीम तयार करतात, कारण सकारात्मक दृष्टी येवची म्हूण. जशीं पुस्तकां सामान्य मनशां मेरेन वचपाक जाय म्हूण तांचें मोल लेगीत सर्वसामन्याक परवडा सारकें आसपाक जाय. तेच पद्धतीनं वखदां सगल्यां मेरेन पावपाक जाय. आमच्या गोंयांत तर खोर्ली भलायकी केंद्रान डिजिटल पद्धत आपणायल्या. संवसारभर फार्मासिस्ट आनी फार्मसी हांकां आव्हानां आसतातूच. कोरोना काळांत तांच्या माथ्यार चड आव्हान आशिल्लें. हेल्थ केअर भितर दोतोरा वांगडा फार्मासिस्ट, फार्मसी चलोवपी हें मुखेल भूमिका साकारतात. दुयेंतींक सारकें, योग्य तें वखद मेळचें हाचो यत्न आसता.
काय फावट तांकां समुपदेशनुय करचें पडटा. आधुनिक तंत्रगिन्याना खातीर टेली फार्मसी , तसेच नेमा खातीर त्यांच्या व्यवसायान लेगीत फरक पडत गेला. आदी फार्मसीन वच्चे पडटाले आता ओखदा घेवन तुमच्या दारान तांचो मनीस पावता . ह्या फाट्यान जर तुम्ही वचपाक सोदतात तर धावी उपरांत तुम्ही विज्ञान फाटो घेवपाक जाय हें करताना बायोलॉजी केमेस्ट्री विशय घेवपाक विसरू नाकात. ताच्या उपरांत बारवेक 50 % गुण घेवन पास जावपाक जाय. तुमी फार्मसी फाट्यान डिप्लोमा ना जाल्यार पदवी शिक्षण घेवंक शकतात. गोवा कॉमन एंट्रन्स टेस्ट दिवची पडटा. ती सादारण बारावेचे परिक्षे उपरांत आसता. नेमान काय बदल जाले तर हे परिक्षेच्या सुवातेर तुमकां दुसरी एखादी परिक्षा दिवची पडटली, पूण परिक्षा ही आसताच. हे खेरीज जर तुमी हेर राज्यांत शिकूंक वतात तर त्या राज्याची परिक्षा दिवची पडटली.
दोनूय फार्मसी कॉलेजींचीं संकेतथळां आसात. सद्या भरपूर वेळ आशिल्ल्या कारणान जर तुमी ह्या फाट्याचो विचार करतात जाल्यार प्रत्यक्ष ह्या संस्थेक भेट दिवपाक विसरूं नाकात. फार्मसिस्ट लोकांक खंय दोतोरांचे अक्षर कळटा, असो एक विनोद. पूण एक खरें की तांचें काम क्लिश्ट आसता. दुयेंतीक फाव ती आनी दोतोरान बरयिल्लीं वखदां तो दिता. समजा ताचे कडे तीं नासत तर दुसरे कंपनीचें तो वखद दुयेंतीक सांगून दोतोरान बदलल्या उपरांत अशें धाडस करता, पूण दुयेंतीक/ दोतोराक विस्वासान घेवन. बारावी विज्ञान फाटो 50 % गुण घेतले की तो राज्याची प्रवेश परिक्षा दिता आनी त्या गुणां नुसार ताका जो क्रमांक मेळटा त्या प्रमाण तो प्रवेश घेता. ह्या प्रवेशाच्यो फेरी जातात. एका फेरयेन प्रवेश मेळ्ळो ना तर फुडले फेरयेन मेळपाची शक्यता आसता. इत्सूक उमेदवारांनी ह्या दोनूय फार्मसी कॉलेजीचीं संकेतथळां पळोवचीं. https://gcp.goa.gov.in/ हें फार्मसी कॉलेज पणजेचें संकेतस्थळ तर फर्मागुडीच्या फार्मसी कॉलेजीचें संकेतथळ आसा https:// www.pespharma.com/. थंय भेट दिवन मागीर निर्णय घेवचो. ह्या फाट्यान आयले तर तुमका फार्मसी सुरु करपाक मेळटा. ह्या खेरीज प्रयोग शाळा फार्मा कंपनी, पदव्युत्तर शिक्षण, संशोधन कॉलेजींन शिकोवप ह्यो संदी मेळूं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
