भांगरभूंय | प्रतिनिधी
हरमलांतल्या हेर रेस्टॉरंट, हॉटेलांची फायर एनओसी तपासपाचे निर्देश
भांगरभूंय । प्रतिनिधी
पणजी : हरमला उजो लागिल्ल्या 6 रेस्टॉरंटा मदल्या एकाय रेस्टॉरंटाकडेन फायर एनओसी नाशिल्ली. उजो पालोवपा खातीरचे कसलेच उपकरण वा यंत्रणा नाशिल्ली. हे फांटभूयेर हरमल वाठारांतली हेर रेस्टॉरंटा/हॉटेल्स वा क्लबांची फायर एनओसीची तपासणी करची. फायर एनओसी नासत जाल्यार गुन्यांव नोंद करून कायदेशीर प्रक्रीया सुरू करची, अशें निर्देश उजो पालोवपी दळाक दिल्या. उजो लागिल्ल्या रेस्टॉरंटाकडेन गरजेचे कसलेच परवाने नाशिल्ल्यान तांकां लुकसाण भरपाय मेळप अशक्य आसा. रेस्टॉरंटांक लागिल्ल्या उज्या संबंदी चवकशी अहवाल सादर केले उपरांत उपजिल्होधिकाऱ्यांनी हे आदेश दिल्या.
हरमला शेनवारा फांतोडेर उजो लागून 6 रेस्टॉरंटांचें लुकसाण जालें. डिसेंबरांत बर्च बाय रोमीओ लेन क्लबाक उजो लागून 25 जाणांक मरण आयिल्लें. हे घडणुके उपरांत खासा समिती वरवीं क्लब्स, रेस्टॉरंट हांची पळोवणी करून सुरक्षा ऑडिट करपाची प्रक्रीया सुरू जाल्ली. आजून लेगीत बरीच रेस्टॉरंटा तशेंच हॉटेलांनी सुरक्षेचे उपाय नात. उजो लागल्यार तो पालोवपा खातीरची उपकरणां नात, हे शंनवारच्या घडणुके उपरांत दिसून आयलां. सध्या हरमलांतल्या रेस्टॉरंटां कडेन आशिल्ल्या फायर एनओसीची तपासणी करपाचे निर्देश दिल्या. हेर वाठारांतल्यांन कागाळी आयल्यो जाल्यार त्या वाठारांतल्या फायर एनओसीची तपासणी जातली, अशी म्हायती उत्तर गोंय जिल्होधिकारी अंकीत यादव हांणी दिली. बर्च बाय रोमीओ लेन क्लबाक लागिल्या उज्यांत जीवितहानी जाली. हरमलच्या उज्यांत जीवितहानी जावंक नासली तरी हो प्रकार गंभीर आसा, अशें जिल्होधिकारी अंकीत यादव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
