भांगरभूंय | प्रतिनिधी
चिंतन – ३१
अतिशया अंतीं लाभ किंवा घात ।
फळ देतें चित्त बीजा ऐसें ॥
तुकोबांच्या अभंगातल्या ह्या ओळींचो अर्थ सामको सोंपो आसलो तरी ताचो आमच्या जिविता कडेन खूब संबंद आसा.
आमी सगळे दिसपट्टे धांवपळींत, कितें तरी मेळोवपाच्या नादांत आसतात. केन्ना आमी शॉर्टकट सोदतात, केन्ना विचार करिनासतना धाडसी पावलां उबारतात. ‘चलात, कितें तरी करुया, नशिबांत आसल्यार फायदो जातलो, ना जाल्यार पळोवया!’ हो विचार आमच्या मनांत येता. पूण तुकोबा म्हणटा, अतिशया अंती (म्हणल्यार उत्कर्शाच्या तेंगशेर कितेंतरी केल्यार, विचार करिनासतना बी) फायदो जातलो वा घात. पूण तें कित्याचेर अवलंबून आसता? तुमच्या मनांत खंयचें बीं आसा ताचेर तुमचें फळ आदारून आसता.
म्हाका एक इश्ट आशिल्लो संजय. ताका बेगीन गिरेस्त जावपाची इत्सा आशिल्ली. शेअर मार्केटांत खूब पयशे मेळटात अशें ताणें आयकलें. कांयच अभ्यास करिनासतना, कसलीच म्हायती मेळनासतना ताणें आपले जिणेंतली सगळी जोड एका इश्टाच्या सल्ल्यान ‘अति धोको’ आशिल्ल्या शॅरांनी गुंतयली. ताच्या मनांत एकूच विचार आशिल्लो, ‘म्हाका फट करून फायदो जातलो’. परिणाम कितें जालो? तो शॅर सकयल देंवलो आनी संजयाक व्हड लुकसाण जालें. हाचें कारण कितें आशिल्लें? कारण ताच्या मनांत ‘ज्ञान’ आनी ‘धीर’ हाचें बीं नाशिल्लें. फकत ‘लोभ’ आनी ‘अतिशय (चड)’ हांचें बीं आशिल्लें.
हाच्या उरफाटो अमित. ताका स्वताचो वेवसाय सुरू करपाची इत्सा आशिल्ली. ताणें जायतीं वर्सां अभ्यास केलो, ल्हान व्हड कामां केली, लोकां कडेन उलयलो, बाजार समजून घेतलो. ताच्या मनांत ‘कश्ट’, ‘विस्वास’ आनी ‘सकारात्मकता’ हांचें बीं आशिल्लें. सुरवेक ताका जायत्या अडचणींक तोंड दिवचें पडलें, पूण ताणें हार मानली ना. ताणें ‘चड’ कांयच केलें ना, पूण विचारपूर्वक, नियोजीत पद्दतीन काम करीत रावलो. आयज ताचो वेवसाय खूब यशस्वी जाला. ताच्या मनांतल्या बीं प्रमाण फळ मेळ्ळें.
एक शेतकार बियांची जतनाय घेता. तो मातयेची जतनाय घेता, तिका उदक दिता आनी सारें घालून बरी पिकावळ मेळटा. तेच प्रमाण आमच्या मनांत बऱ्या विचारांचें, सकारात्मकता, कश्ट करपाची तयारी, दुसऱ्याचो मोग आनी आदर हांचें बीं आसल्यार तें फळ निश्चीतपणान बरें मेळटलें. पूण मनांत दुस्वास, मत्सर, आळस, हाव हांचें बीं आसत जाल्यार फळूय तशेंच मेळटलें. आमच्या मनांतलें ‘गणित’ खूब म्हत्वाचें. जशें तुमी बीं पेरतले तशेंच फळां तुमकां मेळटलें.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
