भांगरभूंय | प्रतिनिधी
मडगाव: फातोड्ड्यां दक्षीण गोंय जिल्लो हॉस्पिटला सामकार रस्तो हुपतना वेगान येवपी गाडयेचो धपको बसून प्रवीण सावंत (४८, रा. वेर्णा) हांकां मरण आयलें.
चड म्हायती प्रमाण, हो अपघात आयतारा रातीं सुमार सवाय दोनांक घडलो. दवंडे, फातोड्ड्यां दक्षीण गोंय जिल्लो हॉस्पिटला सामकार प्रवीण सावंत हे रस्तो हुपताले. तेन्ना मडगांवच्या वेर्णा दिकेन वचपी एके वेगान आयिल्ले गाडयेन ताका नेटान धपको दिलो. ह्या अपघातांत प्रवीण सावंत गंभीर जखमी जाले. ते बरोच वेळ रस्त्यार तशेच पडून उरले. हे घडणुके उपरांत गाडी चालक मात थंयच्यान पळून गेलो. उपरांत ’१०८’ ऍम्बुलन्सींतल्या वैजकी अधिकार्यांनी ताची तपासणी केली. तेन्ना प्रवीण सावंत हाका जाग्यारूच मरण आयिल्ल्याचें घोशीत केलें.
फातोड्ड्यां पुलिसांनी हे विशीं पंचनामो करून गुन्यांव नोंद केला. ताची कूड दक्षीण गोंय जिल्लो हॉस्पिटलाच्या मोर्गांत दवरल्या. प्रवीण हाका धपको दिवन पळून गेल्लो दुबावीत गाडी चालकाची पुलीस सध्या सोद घेतात. फुडलो तपास पुलीस उपनिरीक्षक सलील गांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
