भांगरभूंय | प्रतिनिधी
आमचे लागीं ना तें आमी दुसऱ्यांक दिवंक शकनांत. आमची जीण उलयता जाल्यार फातरा भशेन जियेतली पासून मोवाळ जावंक वेळ लागचो ना.
कार्मेलीत पाद्री सर्गेस्त फादर फेलीक्स सिल्वा जाका सायमन स्टाॅक ( Simon Stock) ह्या नांवान वळखताले, ते शेळीं गांवांत आपलो गंवळीक वावर करताले. ते थंयचे गेल्या उपरांत ताचो वावर पळेवन, खास तरेन ते चलून वताले ताची याद काडून आनी ताची जीण दोळ्यां मुखार दवरून थंयचे कांय जण अशें उद्गारताले : “फातर पासून ताका ‘सायमन स्टाॅक, सायमन स्टाॅक ‘ म्हणटात.” तांच्या मरणाकय लोकांनी केल्ली गर्दी हेंच सिद्द करताली. ताणीं, लोका कडेन तशेंच सैमा कडेन दवरिल्ल्या संबंदाची याद तीं करतालीं.
आमी केन्नांच ‘फातर’ उलयलले पळेवंक नांत. ‘फातर’ हें उतर आयकतनाच, घट आनी क्रूर एके अशे वस्तूची वा एका मनशाची याद येता. केन्ना- केन्नांय कांय जण ‘फातर’ हें उतर कोणूय शिकपांत जड आसल्यार, वा कोणूय कांयच समजणी ना असली वागणूक दाखयता जाल्यार, ताका वापरतात. पूण ‘फातर उलो करतात ‘हीं उतरां मातशे वेगळेंच कितें सांगतात. मनशान सैमा कडेन दवरिल्ल्या संबंदाचो उगडास तो. आमचे मदीं साबार जण भौशीक मळार बरो वावर करतात. पूण खासगी रितीन मनीसपण विसरून जियेतात तेन्ना मात बरें दिसना. मनीस संबंदांचेर धांपणें घालतात. असले परिस्थितींत ते दुसऱ्यां खातीर फातर जातात आनी तांचेर फातर शेवटितात.
फातर मजबूत. ते उलयनांत. तांकां मोवाळायेचें रुपच ना. पूण फातराक मोवाळ करपी मनीस जियेवन गेल्यात आनी आमचे मदीं जियेतात. उत्तर भारतांत आपलो मिसियोनारी वावर करपी एक पाद्री भाव आपली कथा अशी सांगतात: मिगेल नांवाचो ताचो फिरगोजकार, फिरगोजेच्या कसल्याय येवजण्यांक आडमेळीं घालतालो. सगळो लोक ताका भियेतालो. एकदां नातालांचें रातचें मीस चलताना, आपूण लायट उडयतोलों म्हूण ताणें धमकी दिली. फिरगोजकारां पेत्रोलमास घेवन तयार आसलीं. मीस सुरू जातच पाद्री विगारान मिगेलाक इगर्जेच्या मुखार भायर पळेलो. मीस चलतना तो पासयो मारतालो. देवाचें उतर ताणें आयकललें. मीस सोपलें. तो थंयच आसलो.
पाद्री विगार भायर गेलो आनी ताणें ताका म्हळें: “मिगेल, आयज नातालां. तूं भितर ये.” हीं उतरां आयकून मिगेलान दुरगा वयल्यान उडी मारून पाद्री विगाराचे पांय धरले. रडूंक लागलो. भोगसणें मागलें. आयज मिगेल तेच फिरगोजेंत क्रियाशील वांगडी कसो वावर करता.
आमी समाजांत वावुरताना दुसऱ्यांसवें मोवाळ जावंयेता; तेच बरोबर दुसऱ्यां खातीर फातरूय जावंक जाता. तरेकवार मनशां आमकां मेळटात. केन्ना- केन्नांय तांची वागणूक विचित्र लागता. तांची वागणूक पळेवन आमकांय तांचे कडेन फातर जावंचें, अशें दिसता. असल्या वेळार आमी आमचें मनीसपण जागोवंक जाय. तें विकूंक फावना. दुसऱ्याची वागणूक आमकां जाय तशी जायना म्हूण आमी आमचें हांशें करून घेतलें जाल्यार तातूंत कसलें शाणेपण? फातरा भशेन वागपी मनशां सवें आमी मोवाळ जावंचें आव्हान स्विकारल्यार कितें वायट?
असलें आव्हान स्विकारुंक आमचे जिणेची देख गरजेची. आयज आमी आमचे जिणेंत भितर सरुंक जाय. आमचीं उतरां आनी करण्यो बरोबर वतात जाल्यार बरें आसा; ना जाल्यार आमी आमकांच मोवाळ करून घेवंचें पडटलें. आमचे लागीं ना तें आमी दुसऱ्यांक दिवंक शकनांत. आमची जीण उलयता जाल्यार फातरा भशेन जियेतली पासून मोवाळ जावंक वेळ लागचो ना.
आमची भासूय खूप म्हत्वाची जाता. आमी दुसऱ्यां लागीं कशीं उलयतात? राग मोगानूच फारीक करुंक जाता. हें आमी मनांत घोळोवंक जाय. आमी आपणायलली ‘Tit for tat’ वृत्ती फावो तितलो प्रतिसाद दिना. दुसऱ्यान म्हाका केलां तशेंच हांवें दुसऱ्याक करुंक जाय म्हूण तर आमच्या मनांत गेलें, जाल्यार आमी पयलीं फातरा भशेन वागणूक दाखयतलीं.
दुसरो कसलीय वागणूक दाखोवूं, आमी जाता तितलीं दुसऱ्यांसवें मोवाळ जावप हीच आयच्या काळाची गरज. दुसरो आमकां कितें म्हणटलो? अशें तर आमी चिंतुंक पडले जाल्यार आमचे कडच्यान कांयच निर्माणकारी वावर जावंचो ना. कितें म्हणटात तुमी?
– जॉन एम्. आल्फोंसो, कार्मेलीत,
(लोलयें) 7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
