भांगरभूंय | प्रतिनिधी
केपें: एआयसीएफबी वेस्ट झोन बुद्दीबळ (दृश्टी हिना खातीर) 2023 सर्तीचो शुभारंभ आदले मंत्री चंद्रकांत कवळेंकार हांचे हस्तुकीं फातर्प्यां श्रीशांतादुर्गा कुंकळ्ळकान्न देवस्थानाच्या सभाघरांत जालो.
ह्या वेळार सरपंच महेश फळदेसाय, पंच वांगडी शितल नायक, मनीष थूल, किशोर बांदेकार, संजय कवळेंकार, स्वप्नील शाह, किशोर देसाय, अमृत नायक, समीर नायक आनी हेर मानेस्त हाजीर आशिल्ले.
जिणेंत कितेंय तरी साद्य करपाचें सपन बाळगून जिद्द, चिकाटी आनी कश्टाच्या बळार येसाचे तेंगशेर पावतले अशी भावना आशिल्ल्या भुरग्यांची तोखणाय करप तितली उणी अशें कवळेंकार हांणी म्हणलें.
फुडारांत चीनांत जावपी सर्तींत हीं भुरगीं येस मेळोवन देश आनी राज्याचें नांव व्हड करतलीं. फाटल्या बारा वर्सां पयलीं अशी सर्त गोंयांत जाल्ली त्या वेळार हांव मुखेल सोयरो ह्या नात्यान हाजीर आशिल्लों अशें कवळेंकार हांणी म्हणलें.
चार दीस ही सर्त हांगा जावपाची आसून स राज्यांतल्यान प्रतिनिधी हे सर्ती खातीर वांटेकार जाल्यात. हांव तांकां सगल्यांक शुभेत्सा दितां अशें कवळेंकारान मुखार उलयतना म्हणलें.
ह्या वेळार मुखेल सोयऱ्यांचे हस्तुकीं दिवली पेटोवन कार्यावळीक सुरवात जाली. ह्या वेळार हेर मानेस्तांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
