भांगरभूंय | प्रतिनिधी
भांगरभूंय । प्रतिनिधी
पणजीः गोंयांत 1 जानेवारी तें 30 सप्टेंबर मजगती 2,244 अपघात जालें आनी तातूंत 195 जाणांक मरण आयलें. वेर्णा पुलीस स्टेशनाचे हद्दींत सगल्यांत चड 204 अपघातांची नोंद जाल्या आनी 23 जाांक तातूंत मरण आयलें. कोलवाळ पुलीस स्टेशनाचे हद्दींत जाल्ल्या अपघातांत दुपेटीन वाड जाल्या. 92.75 टक्के अपघात वाहन चालकांच्या घाळपणाक लागून जाल्यात अशें येरादारी पुलीस विभागाच्या अहवालांत म्हणलां.
अपघातांचेर निंयत्रण दवोरपाचे सगले तरेच यत्न चल्ल्यात तरी फोंणकुलां पडिल्ले रस्ते, रस्त्यांचे सदोश बांदकाम, वाहन चालकांची बेफिकीर, येरादारी नेमांचें उल्लंघन ह्या कारणाक लागून अपघात जातात अशें दिसून आयलां. फाटल्या 9 म्हयन्यांत वेर्णा पुलीस स्टेशनाचे हद्दींत 204 अपघात जाले. फोंडे (202), पणजी (165), पोरणे गोंय (160), पर्वरी (147), मायणा- कुडतरी (141), म्हापशें (107), आगशी वाठारांत 102 अपघात जाले. फोंड्यांत 17, मायणा- कुडतरी 16, पोरणे गोंय 15, मडगांव 13, आगशी 12 आनी पेडण्यांत 10 लोकांक अपघाती मरण आयलें. 195 लोक अपघातांत मेले तातूंत सगल्यांत चड 130 दुचाकी चालक आनी फाटीं बशिल्ले मेल्यात.
945 अपघात दुचाकींक जाल्यार 923 अपघातांत चार चाकी वाहनांक जाले. सगल्यांत चड दुचाकी अपघात फोंडें पुलीस स्टेशनाचे हद्दींत जाल्यात. सगल्यांत चड 175 चार चाकी अपघात पणजे पुलीस स्टेशनाचे हद्दींत जाल्यात.1,338 अपघात राज्य म्हामार्ग आनी 906 अपघात राष्ट्रीय म्हामार्गार जाल्यात. 1,357 अपघात दीस उजवाडांत जाल्यार 887 अपघात रातयां जाले. पोरूंच्या 9 म्हयन्यांचें तुळेंत अदूं अपघांत 66.67 टक्के वाड जाल्या अशें दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
