भांगरभूंय | प्रतिनिधी
अनमोड रस्तो रुंदीकरणा खातीर 12 हजारां परस चड झाडां मारलीं
झाडां मारपा विशीं 2 वर्सांत 215 कागाळी
पणजी: फाटल्या 5 वर्सांत रानां खात्यान गोंयांत 23 हजारां वयर झाडां मारपाक मान्यताय दिल्या. अनमोड वाठारांत रस्तो रुंदीकरणा खातीर 12 हजारां परस चड झाडां मारपाक मान्यताय दिल्या.
रानां खात्याचे मंत्री विश्वजीत राणे हांणी कार्लोस फेरेरा आनी विजय सरदेसाय हांच्या प्रस्नाचेर ही लेखी म्हायती दिली.
– धारगळ वाठारांत मोपा विमानतळ रस्त्या खातीर 2.89 हॅक्टर जमनींत 538 झाडां मारपाक मान्यताय.
– चांदेल वाठारांत मोपा विमानतळ रस्त्याच्या लायटनींग यंत्रणे खातीर 0.25 हॅक्टर जमनींत 108 झाडां मारपाक मान्यताय.
– पेडणें म्हालांत चांदेल लागसगरच्या वाठारांत मोपा विमानतळाच्या कामा खातीर 6.85 हॅक्टर जमनींत 1072 झाडां मारपाक परवानो.
– मोलें आनी कुळें वाठारांत रेल्वेक वीज पुरवण करपा खातीर 0.85 हॅक्टर जमनींत 404 झाडां मारपाक मान्यताय.
– धारबांदोडें, सांगें, उसगांव वाठारांत वीज वाहिनीच्या कामां खातीर 78.29 हॅक्टर जमनींत 6493 झाडां मारपाक मान्यताय.
– सांवड्डें वाठारांत रेल्वे दोट्टीकरणा खातीर 1.90 हॅक्टर जमनींत 394 झाडां मारपाक मान्यताय
– कोडली, दाबाळ वाठारांत वीज वाहिनी खातीर 78.29 हॅक्टर जमनींत 1880 झाडां मारपाक मान्यताय.
– अनमोड, मोलें वाठारांत 32.08 हॅक्टर जमनींत 12238 झाडां मारपाक मान्यताय.
झाडां बेकायदाे मारपा विशीं फाटल्या 2 वर्सांत 215 कागाळींची नोंद जाल्या. 2023 – 24 वर्सा 98 जाल्यार 2024 – 25 वर्सा 117 कागाळींची नोंद जाल्या. काय कागाळींचो तपास सुरू आसा जाल्यार काय कागाळींनी दंड जाला अशें रानां मंत्र्यांनी लेखी जापेंत म्हणलां.
केंद्रीय रानां मंत्रालयांत राना विशीं जो अहवाल दिला, तातूंत गोंयांत हरीत वाठार उणो जाला असो उल्लेख ना. हरीत वाठार वाडचो म्हूण उपाय येवजण्यो लेगीत तांणी सुचोवंक नात अशी लेखी म्हायती रानां मंत्र्यांनी दिली.
हरीत वाठार उणो जाल्यान गोंयच्या सैमाचेर वा उदकाच्या सांठ्याचेर कितले प्रमाणांत परिणाम जाला, हें सांगप शक्य जावचें ना. सरकारान हाचो एजन्सी वरवीं अभ्यास करूंक ना अशेंय रानां खात्याच्या मंत्र्यांनी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
