भांगरभूंय | प्रतिनिधी
वट्ट 17,515 जाणांक एचआयव्हीची लागण
भांगरभूंय I पिनाक कल्लोळी
पणजी: गोंयांत 1987 ते जुलय 2023 ह्या 36 वर्सांच्या काळांत 17,515 जाणांक एचआयव्हीची लागण जाल्ली. ह्या काळांत वट्ट 1,890 जाणांक एड्स दुयेंस जाल्ले. तातूंतल्या 1,298 दुयेंतींक मरण आयलें. तशेंच 2009 त एड्स दुयेंसाक लागून 140 जाणांक मरण आयलें. जानेवारी ते जुलय 2023 ह्या काळांत 11 दादले आनी 5 बायलांक एड्स दुयेंसाक लागून मरण आयलां. राज्य एड्स नियंत्रण संस्थेचे प्रकल्प संचालक डॉ. गोकुळदास सावंत हांणी आमच्या प्रतिनिधी कडेन उलयतना ही म्हायती दिली.
मरण अायिल्ल्या 1,298 दुयेंतीं मदीं 858 म्हणल्यार 66 टक्के दादले दुयेंती आशिल्लेे. जाल्यार 439 बायलां दुयेंतींचो आस्पाव आशिल्लो. तशेंच एका ट्रान्सजेंडर दुयेंतीचो आस्पाव आशिल्लो. 2008 त 115 दुयेंतींक, 2007 त 109 दुयेंतींक जाल्यार 2006 त 108 जाणांक एड्स दुयेंसाक लागून मरण आयलें. तशेंच 2002 त एड्स दुयेंसाक लागून 14 जाणांक मरण आयिल्ल्याची नोंद जाल्या.
मेळिल्लें म्हायती प्रमाण, वट्ट 17,515 दुयेंतीं मदीं 11,140 दादले दुयेंतींचो आस्पाव आशिल्लो. जाल्यार 5,984 बायलां तशेंच 14 ट्रान्सजेंडर दुयेंतींचो आस्पाव आशिल्लो.
2005 आनी 2007 त दरेकी 1,029 एचआयव्ही दुयेंती मेळिल्ले. 2003 त 1,016 एड्स दुयेंती, 2002 त 999 दुयेंती, जाल्यार 2004 त 956 एड्स दुयेंती मेळिल्ले. तशेंच 1987 वर्सा सगल्यांत उणें म्हणल्यार 3 व्यक्तींक एचआयव्हीची लागण जाल्ली. अंदूं 1 जानेवारी ते जुलय 2023 मजगतीं, 92 दादले, 43 बायलां आनी एका ट्रान्सजेंडर व्यक्तीक एड्साची लागण जाल्या.
गोंयांत 1987 वर्सा एड्साचो पयलो दुयेंती मेळिल्लो. ती व्यक्ती विदेशी नागरीक आशिल्ली. 1988 त गोंयांत भायल्या राज्यांतलो एड्स बादीत दुयेंती मेळिल्लो. जाल्यार 1989 त पयलेच खेपे एका गोंयकार विद्यार्थ्याक एड्साची लागण जाल्ली. 1987 ते 1992 ह्या पांच वर्सांच्या काळांत 201 एचआयव्ही बादीत दुयेंती मेळिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
