भांगरभूंय | प्रतिनिधी
सरासरी दर दिसा 7 अपघात, 31 वरांत एकल्याक मरण
भांगरभूंय । प्रतिनिधी
पणजीः 1 जानेवारी ते 11 सप्टेंबर 2024 ह्या 255 दिसांच्या काळांत गोंयांत सुमार 1,798 अपघातांची नोंद जाल्या. तातूंतले 184 भिरांकूळ अपघातांनी 193 जाणांक मरण आयलें. ही आकडेवारी पळयत जाल्यार दर दिसा 7 अपघात जाल्यार सरासरी 31 वरांत एकल्याक अपघातांत मरण येता. 2023 चे तुळेंत 2024 त 208 (10.33 टक्के) अपघातांनी उणाव जाला. तशेंच अपघाती मरण येवप 12 (5.85 टक्के) उणें जालां. फाटल्या दोन वर्सां परस अदीक काळांत पयलेच खेपे अपघात आनी मरण येवपाचें प्रमाण उणें जाल्ल्याचें दिसून आयलां.
गोंयांत येरादारी नेम मोडिल्ल्यान अपघात आनी अपघाती मरण येता. अशे नेम मोडप्यां आड विशेश मोहीम सुरू करून कारवाय करपाचे निर्देश गोंय पुलिसां वतीन वेळावेळार दितात. तातूंत मुखेलपणान सोरो पियेवन गाडी चलोवप, अतीवेगान गाडी चलोवप, गाडी चलयतना मोबायल फोन वापरप, सीट बेस्ट घालप ना, गाडयांक काळे हारशे लावप अश्या प्रकारांचो आस्पाव आसा. तेचवरी पुलिसांनी विवीध उपक्रम, मोहिमो चालीक लायल्यो. वयली आंकडेवारी पळयत जाल्यार हाचो फायदो कांय प्रमाणांत जाता, अशें दिसून आयलां. मात पेड्डेर रस्ते आनी रस्त्याचें चुकीचे पद्दतीन बांदकाम, गाडी चालकांची घाळपणां, येरादारी नेम मोडप अश्या साबार कारणांक लागून अजून लेगीत अपघात जायत आसा, अशें मुखार येता.
1 जानेवारी ते 11 सप्टेंबर 2024 ह्या काळांत गोंयांत सुमार 1,798 अपघात जाल्यात. तातूंत 184 भिरांकूळ अपघातांची नोंद आसा. वयल्या काळांत वट्ट 193 जाणांक अपघातांत मरण आयलां. 137 अपघातांनी 181 जाणांक गंभीर दुखापत जाल्या. गोंयभर जाल्ल्या 357 किरकोळ अपघातांनी 562 जाणांक किरकोळ दुखापती जाल्यात. 1,120 अपघातांनी गाडयांचें व्हड प्रमाणार लुकसाण जालां. वयल्या काळांत 2023 त गोंयांत 2006 अपघात जाल्ले. तातूंतल्या 188 भिरांकूळ अपघातांनी 205 जाणांक मरण आयिल्लें. त्या वेळार 177 अपघातांनी 269 जाणांक गंभीर, जाल्यार 362 अपघातांनी 569 जाणांक किरकोळ दुखापती जाल्ल्यो. तशेंच 1,279 गाडयांचें व्हड प्रमाणार लुकसाण जाल्लें. ताका लागून पोरूंचे तुळेंत अंदूं 208 अपघात आनी मरण येवपाचीं 12 प्रकरणां उणीं जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
