भांगरभूंय | प्रतिनिधी
पणजी : गोंयांत १ जानेवारी ते १० जुलय ह्या कांळांत वट्ट १,२४८ अपघात जाल्यात आनी ह्या अपघातांच्या घडणुकांनी १४३ जाणांचो जीव गेला. हाचो अर्थ दर दिसा सरासरी ६ अपघात आनी दर ३२ वरांनी अपघातांत एकल्याक मरण येता.
दक्षीण गोंय आनी उत्तर गोंयच्या खुबश्या सुवातांचेर फाटल्या दोन म्हयन्यांनी गंभीर अपघात घडले. सत्तरी, धारबांदोड्यां, बेतोड्यां, मडगांव, कळंगूटे, म्हापश्यां वाठारांत खुबश्या वाहन चालकांक आपलो जीव वगडावचो पडलो. कांय सुवातांचेर दुचाकीचेर प्रवास करपी भायर उसळून पडले, जाल्यार कांय कडेन ट्रक आनी गाडयेचो एकामेका सामकार धपको मारिल्ल्यान अपघात घडलो.
मरणांचें प्रमाण हुस्को करपा सारकें
गोंयांत २०२४चे तुळेंत अंदूं अपघात आनी मरणां कांय प्रमाणांतूच उणीं जाल्यांत. फाटल्या वर्सा ह्याच काळांत १,४२६ अपघात आनी १६८ अपघाती मरणां जाल्लीं. अंदूं १७८ अपघात आनी २५ मरणां मदीं उणाव जरी जाला तरी सदांच ६ अपघातांची नोंद ही हुस्को करपा सारकी गजाल. २०२४ वर्सा पुराय वर्सभर २,६८२ अपघात जाले. तातूंत २८६ अपघाती मरणां जाल्यांत. विशेश म्हळ्यार हातूंतल्या ७२ टक्क्यां परस चड अपघात गांवगिर्या वाठारांत जाल्यात, मरणांय शारांतले तुळेंत व्हड प्रमाणांत गांवगिर्या भागांत जाल्यांत.
सेगीत सरळ रस्त्यावयल्यान वाहन चलयतना चालकाक न्हिद आयिल्ले वरीं स्थिती निर्माण जावप, मेंदवाची प्रतिक्रिया दिवपाचो वेग मंद जावप आनी कांय वेळांतूच कितें घडलें हें लक्षांत उरना. हाका ‘रोड हिप्नोसिस’ वा ‘हायवे संमोहन’ अशें म्हणटात. ही अवस्था सध्या संवसारीक अपघातां फाटल्यान एक मुखेल कारण म्हणून मुखार येता, भारतांतूय जायत्या प्रकरणांनी ही स्थिती दिसून आयल्या. वाहन चलयतना ‘रोड हिप्नोसिस’ची अवस्था चडशी दोन ते अडेज वरांच्या सेगीत प्रवासा उपरांत सुरू जाता. चालकाचे दोळे जरी उक्ते आसले तरी तांचो मेंदू ‘रिकॉर्ड’ करिना. हाका लागून चालकाक वाहन खंय गेलें, कितल्या वेगान आपूण मुखार वतालों आनी मुखारची परिस्थिती कितें आशिल्ली हाचें भान उरना. विशेश म्हळ्यार रातच्या वेळार, प्रवासी न्हिदिल्ले आसतात, वा चालक एकलोच आसल्यार अश्या वेळार ह अवस्था आनीक तिव्र जाता.
सांजचीं ६ ते रातच्या ९ वरांच्या काळांत अपघातांचें प्रमाण सगल्यांत चड
येरादारी पुलिसांच्या विश्लेशणा प्रमाण सगळ्यांत चड अपघात आनी मरणां सांजवेळा ६ ते ९ वरां मजगतीं जातात. ह्या काळांत ५१७ अपघातांतल्यान ६३ जाणांक मरण आयलां. तशेंच दनपरां ३ ते ६ ते सकाळीं ९ ते १२ मेरेनच्या वेळांतूय अपघातांचो आंकडो चड आसा. ह्या वेळार वाहन चालक थकतात, फावो ती लायटी नासता आनी केन्ना केन्नाय सोर्याचो चड प्रमाणांत वापर जाता.
रस्त्यांची स्थितीय जापसालदार
येरादारी नेम मोडप, हेल्मेट घालप ना, सोर्याच्या प्रभावान गाडी चलोवप, गाडी चलोयतना मोबायल फोन वापरप, रस्त्याचे सुरक्षे खातीर रस्त्या कुशीक उबारिल्ल्यो राखणे वणटी आनी रस्त्याक लायटीय नाशिल्ल्याानय अपघातांचो आंकडो वाडला. गोंय पुलीस आतां जनजागृताय, दंडात्मक कारवाय, आनी खाशेली रस्तो आडावपाची मोहीम चालीक लायतात. पूण अपघात थांबवपाचे आसल्यार फकत पुलीस न्हय तर दरेका ड्रायव्हराक जागृत रावपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
