भांगरभूंय | प्रतिनिधी
पणजी : फाटल्या सप्तकाच्या निमाण्या दिसांनी सेगीत तीन दीस सुटी आशिल्ल्यान गोंय पर्यटकांनी फुल्ल आशिल्लें. पर्यटकांचे वाडिल्ले संख्येक लागून पर्यटक भागधारकांचो बरो वेवसाय जालो. गोंयांत येवपी विमानां तशेंच हॉटेलां फुल्ल आशिल्लीं, अशी म्हायती टीटीएजीचे अध्यक्ष जॅक सुखीजा हांणी दिली.
फाटल्या सप्तकांत निमाण्यां दिसांनी सेगीत तीन दीस सुटी आशिल्लयान गोंयच्या पर्यटना खातीर भांगराळी संद थारली. शुक्रारा 15 ऑगस्टाक स्वातंत्र दिसाचे सुटये वांगडा शेनवार आनी आयतार हे सुटयेचे दीस आशिल्ल्यान पर्यटकांक गोंया येवपाची संद मेळ्ळी.
उत्तर तशेंच दक्षीण गोंयच्या दर्यादेगांनी पर्यटकांची खूब गर्दी पळोवपाक मेळ्ळी. कळंगूट सारकिल्ल्या दर्यादेग वाठारांत पर्यटकांची घिट्टी पडिल्ली. रस्त्यार गाडयो आनी बशींची संख्या वाडून येरादारीची कोंयडी जाल्ली. तशेंच पणजे पाटो वाठारांत कॅसिनो आनी क्रूझ बोटींनी येवपी पर्यटकांक लागून दयानंद बांदोडकार मार्गार गाडयांचो रांको लागिल्ल्यो.
हे विशीं म्हायती दितना टीटीएजीचे अध्यक्ष जॅक सुखीजा हांणी सांगलें, फाटले तीन दीस पर्यटना खातीर, गोंया खातीर खूब बरे आशिल्ले. ह्या तीन दिसांत पर्यटक भागधारकां खातीर खूब बरो वेवसाय जालो. सगळीं हॉटेलां 85 ते 90 टक्के फुल्ल आशिल्लीं. गोंयांत गाडयो घेवन येवपी पर्यटकां सयत गोंयांत येवपी विमानां पर्यटकांनी भरिल्लीं. एकदंरीत बरें सप्तक हे खेपे पर्यटना खातीर दिसून आयलें, अशें सुखीजा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
