भांगरभूंय | प्रतिनिधी
पणजीः फाटल्या लांब सुटयेच्या सप्तकांत गोंयच्या दर्यादेगेर जिवरक्षकांनी 5 जणांक बुडपा पसून वाटायले. जाल्यार, शेणिल्ल्या 3 भुरग्यांचो सोद लावन तांकां पालकां कडेन सोंपयलें. तशेंच एका चोराक धरून पर्यटकाचो शेणिल्लो मोबायल ताका परतून मेळोवन दिलो.
आश्वे दर्यादेगेर बंगळुरूचो एक 37 वर्सा पिरायेचो मनीस न्हाता आसतना ताका ल्हारांनी अचकीत ओडून व्हेलो. जिवरक्षकांनी तांकां जेट स्कीच्या आदारान सुरक्षीत देगेर हाडलो. ताका स्वास घेवपाक त्रास जाल्ल्यान 108 वैजकी पंगडान ताची तपासणी करून थोडो वेळ ऑक्सिजन दिलो.
मोरजे लुधियाना हांगासरले 24 ते 25 वर्सा पिरायेचे तीन तरणाटे सुकते वेळार ल्हारांनी आडखळ्ळे. जिवरक्षकांनी उपरांत रेस्क्यू बोर्ड आनी जेट स्कीच्या आदारान तांची सुटका केली.
बागा दर्यादेगेर आमोरेचेर एक 4 वर्सा पिरायेचो भुरगो शेणिल्ल्याची खबर मेळटकच जिवरक्षकांनी सोद मोहीम सुरू केली. जिवरक्षकांनी मोबायल जीप युनिटच्या आदारान त्या भुरग्याक बागा टॉवर लागीं सोदून काडलो. उपरांत गोंय पुलीस आनी बीच वॉर्डन हांचे उपस्थितींत तपासणी करून भुरग्याक ताच्या आवय कडेन सुपूर्द केलो.
कळंगूट दर्यादेगेर कर्नाटकांतली एक 7 वर्सा पिरायेची चली शेणिल्ल्याची खबर मेळटकच जिवरक्षकांनी रोखडीच सोद मोहीम राबयली आनी वॉटर स्पोर्ट्स वाठारांत तिका सोदून काडली. पुलीसांचे देखरेखी खाला तिका ताच्या बापाय कडेन सुपूर्द केली. त्याच दर्यादेगेर उत्तर प्रदेशांतलो एक 4 वर्सा पिरायेचो भुरगोय शेणिल्लो. जिवरक्षकांनी त्या भुरग्याक कांदोळे हांगा सोदून काडलो आनी पालकांचे सुवादीन केलो.
कांदोळे दर्यादेगेर हरियाणाच्या एका 26 वर्सा पिरायेच्या पर्यटकाक ल्हारांनी ओडून व्हेलो. जिवरक्षकांनी रेस्क्यू ट्युबाच्या आदारान ताका वाटायलो. तशेंच, बांबोळेच्या एका 18 वर्सा पिरायेच्या तरणाट्याच्या पांयाक सुमार 1.5 इंच खोल जखम जाल्ली, ताचेर जिवरक्षकांनी मुळावे उपचार करून आनी फुडल्या उपचारा खातीर कांदोळे भलायकी केंद्रांत धाडलो. दुसऱ्या एका प्रकरणांत, बिहारचे 50 वर्साचे एके बायलेक हालचाल करपाक अडचण येवपाक लागली. तिका जिवरक्षकांनी 108 एम्बुलन्सी वरवीं हॉस्पिटलांत धाडली.
बोगमाळो दर्यागेरे एका विदेशी नागरिकाची बॅग ओडून पळ काडपी चोराक जिवरक्षकान ताचो फाटलाग करून ताका धरलो. उपरांत ताका गोंय पुलीसांच्या ताब्यांत दिलो. कोलवा दर्यादेगेर पुण्यांतल्या एका पर्यटकाचो शेणिल्लो मोबायल फोन जिवरक्षकांनी सोदून काडलो आनी पुलिसांचे हाजेरींत तो फोन धनयाक परतून दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
