भांगरभूंय | प्रतिनिधी
तातूंतले 431 कोटी केले खर्च: केंद्रीय मंत्री नितीन गडकरी
पणजी: गोंयांतल्या म्हामार्गांचो विकास आनी दुरुस्ती खातीर केंद्रीय रस्तो येरादारी आनी म्हामार्ग मंत्रालया कडल्यान फाटल्या वर्सा 838 कोटींचो निधी मंजूर जाल्लो. तातूंतल्या 431 कोटींचो खर्च ह्या कामां खातीर केला.
केंद्रीय रस्तो येरादारी आनी म्हामार्ग मंत्री नितीन गडकगी हांणी लोकसभेंतले लेखी प्रस्नाक दिल्ले जापेंतल्यान ही म्हायती मुखार आयल्या. केंद्र सरकारान फाटल्या वर्सा गोंयांतल्या 29 किलोमिटर लांबायेच्या राष्ट्रयि म्हामार्गाचो विकास आनी दुरुस्तीचें लक्ष्य दवरिल्लें. ते खातीर 838 कोटींचो निधी लेगीत मंजूर केल्लो. तातूंतल्या 20 किलोमिटर म्हामार्गांचो विकास आनी दरुस्तीचें काम सुरू आसून वर्सभरांत ताचेर 431 कोटींचो निधी खर्च केला अशें मंत्री नितीन गडकरी हांणी लेखी प्रस्नाचे जापेंतल्यान सादर केल्ल्या आंकडेवारींतल्यान स्पश्ट जालां.
राज्यांतले 29 किलोमिटर अंतराच्या म्हामार्गा वेले ब्लॅक स्पॉट कुशीक काडप, म्हामार्गाची दुरुस्ती करप, अपघात घडचो न्हय हे खातीर उपाय येवजण करप बी सारक्या कामां खातीर केंद्रान फाटल्या वर्सा राज्याक 838 कोटींचो निधी मंजूर केल्लो. तातूंतलीं खूबशीं कामां सद्या सुरू आसात आनी ताचेर आतां मेरेन 431 कोटींचो खर्च केला. फुडल्या कांय म्हयन्यांत निर्धारीत सगलीं कामां पुराय करतले अशेंय मंत्री गडकरी हांणी जापेंत म्हणलां.
मजगतीं, गोयांतले म्हामार्ग, भिरतले रस्ते तशेंच हेर मुळाव्या साधनसुविधां खातीर केंद्र सरकारान फाटल्या धा वर्सांत हजारांनी कोटी रुपया खर्च केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
