भांगरभूंय | प्रतिनिधी
पणजीः फाटल्या वित्तीय वर्साच्या तुळेंत राज्यांतल्या जीएसटी वसुलींत अंदूं 10.64 टक्क्यांनी वाड जाल्या. ही म्हायती केंद्रीय अर्थ मंत्रालयांतल्यान मेळ्ळ्या. ते प्रमाण 2023-24 वित्तीय वर्सा एप्रील ते डिसेंबर ह्या काळांत गोंयांत 4673.43 कोटी रुपया जीएसटी मेळ्ळा. एप्रील ते डिसेंबर 2024-25 ह्या काळांत ही वसुली 5,171 कोटी रुपया जाल्या. अंदूं जीएसटी वसुलींत 497.57 कोटी रुपयांची वाड जाल्या.
मेळिल्ले म्हायती प्रमाण, गोंयांत 2022-23 वर्सा 5,520 कोटी रुपया जीएसटी आनी 2023-24 वर्सा 6,475 कोटी रुपया मेळ्ळे. फाटल्या कांय वर्सांत राज्यांत पर्यटन आनी हेर वेवसाय वाडला. हाका लागून जीएसटी वसुलीय वाडत आसा. वयल्या काळांत सगळ्यांत चड 620 कोटी रुपया जीएसटी वसुली 2023-24 वर्सा एप्रील म्हयन्यांत जाल्ली. देखून ऑक्टोबर 2024 वर्सा 460 कोटी जीएसटी मेळ्ळी.
सगल्यांत चड 765 कोटी रुपया जीएसटी वसुली चालू वित्तीय वर्सा एप्रीलांत जाल्ली. मे आनी सप्टेंबर म्हयन्यांत सगळ्यांत उणें 519 कोटी रुपया जीएसटी वसूल केल्या. केंद्रीय अर्थ मंत्रालयाच्या अहवालांत एप्रील ते डिसेंबर 2024 ह्या काळांत गोंयान एकठांय केल्ल्या वट्ट जीएसटींतल्यान सीजीएसटी 1,489 कोटी, एसजीएसटी 1,887 कोटी, आयजीएसटी 1,771 कोटी आनी सेस 33 कोटी रुपया आशिल्ल्याचें सांगलां.
फाटल्या चार अर्थीक वर्सांत राज्यांतल्यान जीएसटी वसूल करपाची रक्कम दर वर्सा वाडत आसा. 2020-21 वर्साचे तुळेंत 2023-24 वर्सा जीएसटी वसुली सुमार दुपेटीन वाडिल्ली. 2020-21 वर्सा गोंयांतल्यान जीएसटी वसुली 3,270 कोटी रुपया आशिल्ली. 2021-22 वर्सा 4,364 कोटी रुपया जीएसटी वसूल जाली. चालू अर्थीक वर्स सोंपपाक दोन म्हयने उरल्यात. मजगतीं, जीएसटी वसुलींत आनीक वाड जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
