भांगरभूंय | प्रतिनिधी
संसदेंत सरकाराची लेखी जापेंत म्हायती
नवी दिल्ली, खबरां संस्था ः फाटल्या पांच वर्सांत 633 भारतीय विद्यार्थ्यांक परदेशांत मरण आयिल्ल्याची म्हायती सरकारान संसदेंत सादर केल्या. हातूंतली चडशी मरणां कॅनडांत जाल्यात. सैमीक, वैजकी, हिंसक घडणुको अशा वेगवेगळ्या कारणांक लागून हीं मरणां जाल्यांत अशें सरकारान सांगलां. सध्या चालू आशिल्ल्या पावसाळी अधिवेशनात केरळाचे खासदार कोडीकुन्नील सुरेश हांणी हे संबंदी एक प्रस्न विचारिल्लो. त्या प्रस्नाक जाप दितना सरकारान लेखी जापेंत ही म्हायती दिली.
सरकारान संसदेंत सादर केल्या म्हायती प्रमाण, फाटल्या पांच वर्सांत 41 देशांत 633 भारतीय विद्यार्थ्यांक मरण आयलां. हातूंतले चडशी मरणां 172 कॅनडांत जाली. जाल्यार अमेरिकेंत 108, ब्रिटनांत 58, ऑस्ट्रेलियांत 57, रशियेंत 37 आनी जर्मनींत 24 भारतीय विद्यार्थ्यांक मरण आयलां. हाचे भायर शेजारच्या पाकिस्तानांतय एका भारतीय विद्यार्थ्याक मरण आयिल्ल्याची म्हायती सरकारान दिल्या.
हिंसक घडणुकांनी 19 विद्यार्थ्यांक मरण
मरण आयिल्ल्या वट्ट 633 विद्यार्थ्यां मदल्या 19 विद्यार्थ्यांक हिंसक घडणुकांनी मरण आयलें. तातूंतल्या सगळ्यांत चड कॅनडांत 9, अमेरिकेंत 6 आनी ऑस्ट्रेलिया, ब्रिटन, चीन आनी किर्गिस्तानांत दरेकीं एक विद्यार्थ्याक मरण आयलां अशें सरकारान सांगलां.
भारत सरकारान दिल्ल्या आंकडेवारी प्रमाण, 2024 वर्सा परदेशांतल्या वेगवेगळ्या शिक्षणीक संस्थांनी शिकपी विद्यार्थ्यांचो आंकडो 13.35 लाख आसा. फाटल्या कांय वर्सांत ह्या विद्यार्थ्यांचो आंकडो नेटान वाडला. 2022 वर्सा हो आंकडो 7 लाख आनी 2023 वर्सा 9 लाख आशिल्लो. पूण 2024 वर्सा हो आंकडो 13 लाखां मेरेन वाडला. सगळ्यांत चड 4 लाख 27 हजार विद्यार्थी कॅनडांत शिकतात, जाल्यार अमेरिकेंत 3 लाख 37 हजार, ब्रिटनांत 1 लाख 85 हजार, ऑस्ट्रेलियांत 1 लाख 22 हजार, जर्मनींत 43 हजार, संयुक्त अरब अमिरांत 25 हजार आनी रशियेंत 24 हजार 940 विद्यार्थी शिकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
