भांगरभूंय | प्रतिनिधी
पणजीः तीन वर्सांच्या काळांत गोंयात रस्ते अपघातांच्या आंकड्यांत सेगीत उणाव जायत आसा. वर्स २०२२चे तुळेंत वर्स २०२४त ३०० परस चड अपघतांनी उणाव नोंद जाला. हे अपघात उणे करपा खातीर खुपशे उपक्रम सरकारान हातांत घेतल्यात, अशी म्हायती केंद्रीय रस्ते येरादारी मंत्री नितिन गडकरी हांणी लोकसभेच्या पटलार दिल्या.
लोकसभेच्या पटलार लेखी जापेंत जारी केल्ले आकडेवारी प्रमाण वर्स २०२० ते २०२२ मेरेन रस्ते अपघातांत व्हड प्रमाणांत वाड जायत आशिल्ली. मात २०२३त अपघातांचो आंकडो ल्हव ल्हव देंवपाक सुरवात जाली.
२०२०चे तुळेंत २०२२त ६३६ अपघातांत वाड नोंद जाल्ली. मात फाटल्या तीन वर्सांत वाडट्या अपघातांचो आंकडो अर्दे परस उणो जावन वर्स २०२२चे तुळेंत २०२४त ३२९ रस्तो अपघातांत उणाव नोंद जाला. वर्स २०२१त रस्तो अपघातांत ४७४ इतली वाड जाल्ली, २०२२त अपघातांचो आकडो १६२ मेरेन वाडलो. मात २०२३ अपघातांचो आंकडो १६५ मेरेन देवलो आनी २०२४त अपघतांचो आंकडो १६४ मेरेन उणो जालो.
केंद्रीय रस्ते येरादारी मंत्रालयान घेतिल्ले विवीध उपक्रमां खातीर ह्या आंकड्यांत उणाव नोंद जायत आसा. हातूंत येरादारी विशीं जागृताय, रस्त्याचे इंजीनियरींग सुदारप, वाहनांचें इंजीनियरींग सुदारप, कायद्याची खर अंमलबजावणी आनी आपतकालीन काळजी हे गजालींचो आसपाव आसा.
राज्यांतल्या अपघातांचो आंकडो
वर्स – अपघात
२०२० – २,३७५
२०२१ – २,८४९
२०२२ – ३,०११
२०२३ – २,८४६
२०२४ – २६८२
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
