भांगरभूंय | प्रतिनिधी
पणजीः अन्न आनी वखदां प्रशासन (एफडीए) हांणी फाटल्या साडे तीन वर्सांत 2300 परस चड धाडी घाल्यात. तातूंतल्यो देड हजार धाडी ह्या वर्सा म्हणल्यार 2025सात आतां मेरेन घाल्यात. फाटल्या तीन वर्सांचो रेकॉर्ड अंदूंच्या स म्हयन्यां भितर मोडला अशी लेखी जाप भलायकी मंत्री विश्वजीत राणे हांणी दिल्या.
केपेंचे आमदार एल्टन डिकोस्टा हांणी विधानसभेंत विचारिल्ल्या प्रस्नाक लेखी जाप दितना मंत्री विश्वजीत राणे हांणी सांगलें की अन्न सुरक्षा आनी दर्जो कायदो 2006 खाला एफडीएक कारवायेचे अधिकार दिल्यात. ह्या कायद्याच्या तरतुदी वरवीं एफडीएच्या अन्न सुरक्षा अधिकाऱ्यांनी खूबशे सुवातेर पाळत दवरून धाड घालून कारवाय केल्या.
अन्न सुरक्षा उल्लंघनाचो दंड भरले उपरांत आनी सगल्यो गरजो जाग्यार घाले उपरांतच सील केल्लें आस्थापन परतून उक्तें करपाक परवानगी दिता. जर हीं आस्थापनां परतून अन्न सुरक्षा नेमांचें उल्लंघन करतात जाल्यार एफएसएसएच्या कलम 69 खाला परतून तीं आस्थापनां सील करतात.
वर्स 2022 ते 2025 आतां मेरेन आस्थापनां, पसरे आनी गाड्यांनी धाड घालपाच्या प्रमाणांत व्हड प्रमाणांत वाड जाल्या. 2022, 2023 आनी 2024साचो एक वर्साचो आंकड्यांचो रेकॉर्ड एफडीएन 2025सात स म्हयन्यांतच मोडला.
एफडीएन 2022सात 490 धाडी घाल्ल्यो, 2023सात 669 धाडी, 2024सात 1,185 धाडी आनी ह्या वर्सा 2025सात आतां मेरेन 1,501 धाडी एफडीएन घाल्यात अशी लेखी जाप मंत्री विश्वजीत राणे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
