भांगरभूंय | प्रतिनिधी
मारपेट वा मॅच फिक्सींग सारकिल्ल्या प्रकरणाक लागून बंदखणींत गेल्ले संवसारभरांत कितलेशेच क्रिकेट खेळगडे आसात. पूण असो एक क्रिकेट खेळगडो आशिल्लो जाका थेट फांसार दिल्लो, हें केन्ना आयकलां?
फांसार दिल्लो खेळगडो हो वेस्ट इंडिजाचो. ताचें नांव लेस्ली जॉर्ज हिल्टन. लेस्ली एक फास्ट बॉलर आशिल्लो. तो 1935 ते 1939 मेरेन वेस्ट इंडिया वतीन 6 टॅस्ट मॅची खेळ्ळा.
लेस्ली हिल्टनाक आपले घरकान्नीची हत्त्या केल्ल्याच्या गुन्यांवा खाला 17 मे 1955 ह्या दिसा फांसार दिल्लो. घरकान्नीची हत्या करपा फाटलें कारण लेगीत आगळेंच. अशें सांगतात, ताणें आपली घरकान्न लार्लीन रोजाचे बेमुर्वतखोरीचेर बेजार जावन तिची हत्या केली.
लेस्ली आनी लार्लीन दोगांय 1935 त पयले खेपे मेळिल्लीं, जेन्ना लेस्ली हिल्टन आपली पयलीच मॅच खेळटालो. ह्या वेळार तीं मोगांत पडलीं आनी कांय वर्सांनी म्हणल्यार 1942 त तीं लग्न जालीं. 5 वर्सांनी तांकां एक चलो जालो, पूण लग्नाच्या 12 वर्सां उपरांत दोगांच्या नात्यांत वेंर पडली.
उपलब्ध म्हायती प्रमाण, लार्लीनाचो कपड्यांचो वेवसाय आशिल्लो आनी ते खातीर ती एकसारकी न्यूयॉर्क वताली. एकदां अशीच ती कामा निमतान न्यूयॉर्क गेल्ली, तेन्ना लेस्लीक एक निनावी चीट मेळ्ळी. ते चिटयेंत लार्लीन आनी न्यूयॉर्कांतल्या एका मनशा कडेन अनैतीक आशिल्ल्याचें म्हणिल्लें.
चीट वाचून लेस्ली चाळावलो. ताणें आपले घरकान्नीक ताकतिकेन न्यूयॉर्कांतल्यान परतून आपयली आनी हे विशीं घरच्यांक सांगलें. पयलीं पयलीं लार्लीनान ही गजाल सामकी भायर मारली, पूण उपरांत तिणें सांगलें, आपूण त्या मनशाक फक्त वळखता.
लेस्ली तशें आयकुपी नाशिल्लो. ताणें पोस्ट ऑफिसांत वचून आनीक कांय तिच्या नांवा वयल्यो चिटी एकठांय केल्यो आनी हाडून आपले घरकान्नीक दाखयल्यो. ते उपरांत लार्लीन त्या मनशा कडेन आपले अनैतीक संबंद आशिल्ल्याचें मान्य केलें.
लार्लीन त्या मनशा कडेन अनैतीक संबंद दवरपा फाटलें कारण सांगतना सांगलें, लेस्ली ताचे तुळेचो नाशिल्लो. तो ताच्या दर्जाचो नाशिल्ल्यान ती सदांच दुयेंत पडटाली.
हें आयकून लेस्ली सामको बेजारलो. ताणें आपलें आर्म घेतलें आनी घरकान्नीचेर एका फाटोफाट 7 गुळयो घातल्यो. ह्या हल्ल्यांत लार्लीन थंयच मेली. हें प्रकरण न्यायालयांत पावलें आनी न्यायालयान ताका 20 ऑक्टोबर 1954 ह्या दिसा घरकान्नीच्या हत्या प्रकरणांत दोशी थारायलो. ते उपरांत ताका फांशीची ख्यास्त फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
