भांगरभूंय | प्रतिनिधी
केंद्र सरकारा कडल्यान 130 व्या घटना दुरुस्ती सयत म्हत्वाचीं विधेयकां लोकसभेंत सादर केलीं. हातूंत 1. भ्रश्टाचार वा गंभीर गुन्यांव आशिल्ल्या आरोपांचेर सेगीत 30 दिसां परस चड दीस पुलीस वा न्यायालयीन कोठयेंत आशिल्ल्या प्रधानमंत्र्याक, मुख्यमंत्र्याक आनी मंत्र्याक 31 व्या दिसा पदा वेल्यान काडून उडोवंक मेळटलें. 2. निर्दोश सुटका जाले उपरांत प्रधानमंत्री, मुख्यमंत्री आनी मंत्री हांची परतून त्या त्या पदार नेमणूक करूंक मेळटली. 3. ज्या गुन्यांवा खातीर तांकां अटक केल्या, तांचे ख्यास्तीची तरतूद पांच वर्सां वा ताचे परस चड आसची. 4. संबंदितांक दोशी थारायले ना, तरी लेगीत प्रस्तावीत कायद्याक लागून तांकां तांच्या पदा वेल्यान काडून उडोवंक मेळटलें. ह्या पुराय घटना दुरुस्तीक काळजांतल्यान येवकार. पूण फाटल्या खूबशा वर्सां सावन देशांतल्या आदल्या, सद्याच्या 95 टक्के भ्रश्ट राजकी फुडाऱ्यांनी देशाची तिजोरी लुटल्या ताचें कितें? असो प्रस्न आयजूय 140 कोटी लोकांच्या मनांत भेडसायत आसा. ह्या विधेयकांत आनीक एक सुदारणा करूंक जाय आनी ती म्हणल्यार भ्रश्टाचारी राजकी फुडाऱ्यांक फास्ट ट्रॅक कोर्टाच्या माध्यमांतल्यान चवकशी करून ताकतिकेन फांशीचे शिक्षेची तरतूद गरजेची आसा. कारण देशांतल्या वा राज्यांतल्या पुराय आरोपांचे मुखेल कारण म्हळ्यार फक्त भ्रश्टाचार आसा. ताका लागून भ्रश्टाचार करप्यांचेर जर सरकारान आळाबंद हाडत जाल्यार खूबशा आरोपांची संख्या आपले आपूण उणी जातली.
सरकार जो मेरेन भ्रश्टाचाऱ्यां खातीर फांशी सारकी खर ख्यास्तीचो कायदो तयार करिना तो मेरेन भ्रश्ट राजकी फुडारी मेकळे भोंवतूच उरतले, आनी खूबशे नवे नवे गुन्यांवकार निर्माण जातले. ताका लागून भ्रश्टाचारी आरोपी हो राजकी फुडारी आसूं वा अधिकारी ताचेर अंकूश दवरपाचो आसत जाल्यार ताचेर फांशीची ख्यास्त हो एकूच पर्याय आनी उपाय अशें म्हाका दिसता.
आयज राज्यांनीच न्हय जाल्यार पुराय देशांत व्हड प्रमाणांत खूबशा मळार व्हड प्रमाणांत भ्रश्टाचार आनी गुन्यांवांची प्रकरणां सुरू आसात आनी हाका राखण दिवपाचें काम राजकी फुडारी उक्तेपणान करतात. कारण तांच्या हातांत सत्ता आसता. ताका लागून ते सत्तेचो दुरुपेग करून 140 कोटी लोकांचे रगत पितात आनी स्वताची गडगंज संपत्ती जमा करून दवरतात. ताका लागून भ्रश्टाचाऱ्यांक फांशी सारकी खर ख्यास्त जाली जाल्यारूच देशाच्या 140 कोटी लोकांक आनी शेतकारांक समाधान जातलें. आयज कोण गरीब आनी कोण गिरेस्त हाची तुळा करीत जाल्यार आयज देशांतले 95 टक्के सद्याचे आनी आदले राजकी फुडारी करोडपती आसात. जे स्वताक लोकप्रतिनिधी आनी समाजसेवक म्हणटात. हांचे कडेन इतलो पयसो आयलो खंयच्यान आनी येता खंयच्यान? अशे खूबशे प्रस्न आयज उपस्थीत जायत आसात.
सरकारान कायदे जरूर करचे, पूण ते लोकहिताचे आसूंक जाय तेन्नाच त्या कायद्याक वा विधेयकाक खरें लोकशायेचें स्वरूप येतलें. संवसारांत भारताक कृशीप्रधान देश म्हूण वळखतात. ते फाटभुंयेर देशांतलो दरेक शेतकार आयजूय करोडपती आसा, पूण पयशांनी शुन्य आसा अशें कित्याक? हाचो विचार राज्य आनी केंद्र सरकार कित्याक करिना? शेतकार खूबशा काळा सावन शेताचो वेवसाय करीत आसा. ताका वत, पावस, वादळ, सुनामी, हुंवार अशा खूबशा कठीण परिस्थितीक तोंड दिवचें पडटा, तेन्ना तांच्या शेतांतल्यान धान्य उत्पादन जाता आनी देशाच्या 140 कोटी लोकांचें पोट भरता. पूण देशाचो राजकी फुडारी फक्त पांच वर्सा लोकप्रतिनिधी आसता, पूण ह्या पांच वर्सांत अचकीत करोडपती जाता आनी व्हड प्रमाणांत संपत्ती ताचे कडेन येता. हो पयसो येता खंयच्यान हाचोय विचार सरकारान करूंक जाय. कारण पिळग्यान पिळग्यो शेत करपी गरीब आनी पांच वर्सा लोकप्रतिनिधी आशिल्लो करोडपती ही सामकी गंभीर आनी हुस्को करपा सारकी गजाल आसा अशें म्हाका दिसता.
सत्ताधारी पक्ष आपली सत्ता तिगून उरची हे खातीर खूबशे भ्रश्टाचारी, बलात्कारी, खुनी अशे गंभीर गुन्यांव आशिल्ल्या गुन्यांवकारांक सत्ताधारी पक्ष लागीं करता आनी अशे गुन्यांवकार राजकी फुडारी आयजूय सत्तेंत आसात. तशेंच मंत्री लेगीत आसात. ही स्वतंत्र भारताची शोकांतिका म्हणची पडटली. एक भ्रश्टाचारी व्यक्ती लाखांनी लोकांची घरां पोखरता. ताका लागून बेरोजगारी, म्हारगाय, शेतकारांच्यो आत्महत्या उप्रासतात. अशे तरेन देशांत हजारांनी भ्रश्ट राजकी फुडारी आसात की ते देशाच्या 140 कोटी लोकांक स्लोपॉयझन दिवपाचें काम करतात. आमी बलात्कारी, खुनी, आतंकवादी अशे खूबशे गुन्यांवकार पळयल्यात आनी पळयत आसात. पूण हाचे परस हजार पटीन देशांतले 95 टक्के राजकी फुडारी आनी अधिकारी गुन्यांवकार आसात. कारण तो भ्रश्टाचार करून सात पिळग्यांची कोट्यांनी रुपयांची संपत्त जोडटा आनी हाका लागून चलनातले पयशे आपोआप गायब जातात. ताचो फटको आनी प्रायश्चीत देशांतल्या गरीब आनी सर्वसामान्य 140 कोटी लोकांक भोगचो पडटा. ताका लागूनच देशांत बेरोजगारी, म्हारगाय आनी शेतकारांच्यो आत्महत्या वाडिल्ल्याचें दिसून आयलां.
राजकी फुडारी जेन्ना लोकप्रतिनिधी जाता तेन्ना देशाचे प्रती, राज्याचे प्रती आनी देशांतल्या लोकांचे सूख समाधानाचे प्रती देशहिताचें कार्य करपाचो संविधानीक सोपूत घेता. अशा लोकांनी ल्हानसो लेगीत गुन्यांव करीत जाल्यार ताका संविधानीक पदा वेल्यान काडून उडोवंक जाय तेन्नाच लोकशाय तिगून उरतली. देशांत 28 राज्यां आनी 8 केंद्र शासीत प्रदेश आसात, हातूंतले 95 टक्के राजकी फुडारी आनी अधिकारी भ्रश्टाचार करून मालामल जाल्यात आनी हाका लागून देश 10 वर्सा फाटीं गेला हाचें प्रायश्चीत शेतकार, गरीब आनी सर्वसामान्यांक भोगचे पडटात, आनी हाचें चित्र बेरोजगारी, म्हारगाय आनी शेतकारांच्यो आत्महत्येच्या स्वरुपांत आमी पळयतात. ताका लागून महामहीम राष्ट्रपती, प्रधानमंत्री, लोकसभा अध्यक्ष, उपराष्ट्रपती, सर्वोच्च न्यायालय हांकां विनंती करतां की देशाक पोखरून उडोवपी मोटी कीड म्हणल्यार भ्रश्टाचार आनी ताची उत्पत्ती राजकी रिंगणांतल्यानूच निर्माण जाल्या ही गजाल पुराय देशाक खबर आसा. वयल्या मानेस्तांक विनंती आसा की देशाक सुजलाम सुफलाम करपाचें आसत जाल्यार सगल्यांत पयलीं भ्रश्टाचार करपी लोकांक आळाबंद हाडप गरजेचें आसा. जय हिंद!
रमेश लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
