भांगरभूंय | प्रतिनिधी
चेन्नय, खबरां संस्था ः आयच्या डिजिटल युगांत सोशल मिडिया वरवीं प्रेरणा घेवन आहाराचे केल्ले प्रयोग भलायकेक गंभीर धोको निर्माण करुंक शकता. किशोरवयीन चले-चलयां मदीं ‘फिटनेस’ ही वाडत वचपी कल्पना आनी ‘परफेक्ट बॉडी’चो चेपणाक लागून अशें प्रकार घडपाक लागल्यात. हे खातीर पालकांनी सादूर रावप आनी तज्ञांचो सल्लो घेवप गरजेचें.
कन्याकुमारी- तामिळनाडूच्या कोलचलांतल्या सक्तीस्वरन ह्या 17 वर्सां पिरायेच्या तरणाट्याक बिरेस्तारा आपल्या घरा दुबावीत मरण आयलें. तो फाटले तीन म्हयने फळांच्या ज्युसाचेर आदारीत आहार घेतालो. ह्या आहाराक लागून ताका मरण आयलें आसूं येता असो दुबाव कुटुंबियाक आसा.
ताच्या घराण्यांच्या मतान सक्तीस्वरन पयलींच भलायकेन निरोगी आनी सक्रीय आशिल्लो. पूण युट्युबाचेर एक व्हिडियो पळोवन ताणें फकत फळांचो ज्युस पियेवपाचें थारायलें. हो निर्णय घेवचे पयलीं ताणें खंयच्याच वैजकी वा आहारतज्ञांचो सल्लो घेवंक नाशिल्ल्याची म्हायती कुटुंबान पुलिसांक आनी दोतोरांक दिली. तशेंच तो कांय वखदां घेतालो आनी व्यायाम करतालो अशेंय तांणी सांगलें.
बिरेस्तारा सकाळीं अचकीत ताका स्वास घेवपाक त्रास जालो आनी तो बेशुध्द पडलो. ताका हॉस्पिटलांत व्हेलो, पूण ताचे आदीं दोतोरांनी ताका मरण आयिल्ल्याचें सांगलें.
शेजाऱ्यांच्या म्हणण्या प्रमाण, ताका हालींच तिरुचिरापल्लींतल्या एका कॉलेजींत प्रवेश मेळिल्लो आनी कॉलेज सुरू जावचें पयलीं वजन उणें करपाची ताची इत्सा आशिल्ली. फाटले तीन म्हयने तो फकत फळां आनी ज्युस हाचेर जगतालो आनी कांय प्रमाणांत ताचो परिणाम ताच्या वजनाचेर जाल्लो हे ताका पळोवन लक्षांत येतालें.
बिरेस्तारा ताच्या कुटुंबान ताका पयलेच खेपे धर्मीक सुवाळ्या खातीर घन जेवण दिलें. (शीत- रोस, भाजी) पूण ताच्या आंगाक तें जेवण मानूंक नाशिल्लें आसुंये. शेजाऱ्यांच्या म्हणण्या प्रमाण, जेवतकच ताका ओंकारी येवपाक लागली, स्वास घेवपाक त्रास जावपाक लागलो आनी मागीर तो कोसळ्ळो. हॉस्पिटलांत व्हेलो, पूण दोतोरांनी ताका मरण आयिल्ल्याचें सांगलें. सध्या शवविश्लेशणाच्या अहवाल दोतोर तपासतात, मरण येवपाचें खरें कारण अजून स्पश्ट ना. पूण आगळो डायट हें कारण अशें सगल्यांकूच दिसता.
मजगतीं, मार्च 2025 वर्सा केरळांतल्या कन्नूर जिल्ल्यांतल्या 18 वर्सां पिरायेच्या चलयेक अशेच मरण आयलें. नात्यांतल्या लोकांच्या म्हणण्या प्रमाण, तें आपलें दिसपट्टें जेवण कमी करून चड व्यायाम करताले. फकत उदकाचेर रावताले आनी निमाणें तें दुबळें जालें आनी ताका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
