भांगरभूंय | प्रतिनिधी
पणजी : फाटल्या तीन वर्सांत गोंय फलोत्पादन म्हामंडळाचे येणावळींत 25 टक्क्यां मेरेन वाड जाल्या. 2022-23 ते 2024-25 मेरेन म्हामंडळाचे तिजोरेंत सुमार 280 कोटी रुपयां जमा जाल्यात. चडशी येणावळ भाजी विकुनूच आयल्या. जाल्यार फळां आनी भुसारी वस्तूंचो हातूंत आस्पाव आसा, अशी म्हायती म्हामंडळाच्या वरिश्ठ अधिकाऱ्यान दिल्या.
अधिकाऱ्यान दिल्ले म्हायती प्रमाण म्हामंडळान फाटल्या तीन वर्सांत भाजी विकून 253 कोटी, फळां विकून 13.59 कोटी आनी भुसारी सामान विकून 15.28 कोटी मेळून 281 कोटी रुपयांची येणावळ म्हामंडळाचे तिजोरेंत आयल्या. फाटल्या तीन वर्सांत भाजी, फळां आनी भुसारी वस्तू विकपाच्या प्रमाणांत सेगीत वाड जावन येणावळ लेगीत बरी वाडल्या.
2022-23 त म्हामंडळान 79.28 कोटी रुपयांची येणावळ जोडिल्ली, 2023-24 त हे येणावळींत वाड जावन 94.17 कोटी मेरेन पावली आनी वर्स 2024-25 त ही येणावळ वाडून 106 कोटी मेरेन पावली.
2022-23 त म्हामंडळान भाजी विकून 72.10 कोटी रुपयांची येणावळ जोडिल्ली, 2023-24 त हे येणावळींत वाड जावन 85.61 कोटी मेरेन पावली आनी 2024-25 त ही येणावळ वाडून 95.90 कोटी मेरेन पावली.
2022-23 त महामंडळान फळां विकून 2.77 कोटी रुपयांची येणावळ जोडिल्ली, 2023-24 त हे येणावळींत वाड जावन 5.03 कोटी मेरेन पावली आनी 2024-25 त ही येणावळ मात्शी वाडून 5.79 कोटी मेरेन पावली. 2022-23 त म्हामंडळान भुसारी सामान विकून 3.74 कोटी रुपयांची येणावळ जोडिल्ली, 2023-24 त हे येणावळींत वाड जावन 5.34 कोटी मेरेन पावली आनी 2024-25 त ही येणावळ वाडून 6.20 कोटी रुपया मेरेन पावली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
