भांगरभूंय | प्रतिनिधी
कोयर वेवस्थापन म्हामंडळाची कारवाय; 12 हजार दंड वसूल
भांगरभूंय । प्रतिनिधी
पणजीः गोंय कोयर वेवस्थापन म्हामंडळान फार्मागुडी रस्त्या कुशीक कोयर उडोवप्यांचेर कारवाय करपाची मोहीम हातांत घेतली. रस्त्या कुशीक कोयर उडोवपी लोकांक रंगेहाथ धरून तांच्या कडल्यान 12,500 रुपयां परस चड दंड म्हामंडळान वसूल केलो.
गोंय कोयर वेवस्थापन म्हामंडळान ही कारवाय गोंय राज्य प्रदुशण नियंत्रण मंडळ, गोंय पुलीस आनी बांदोडें पंचायतीच्या पालवान केली.
सोमारा सकाळीं 7 ते 10 वरांचेर हार्मनी सर्कल फर्मागुडी ही कारवाय सुरू करून सदांच नेम मोडून रस्त्या कुशीक कोयर उडोवप्यांक रंगेहाथ धरले आनी तांकां दंड दिलो. कांय जाण दुचाकी चलयतना कोयर उडयताले जाल्यार कांय जाण गाडयेंतल्यान देंवून कोयर भायर मारताले. तांकां आडोवन ताचेर दंडात्मक कारवाय केल्या, अशें म्हामंडळाच्या अधिकाऱ्यान सांगलें.
अधिकाऱ्यांनी पांच जाणांक रंगेहाथ धरून कायद्या खाला दरेके व्यक्तीक अडेज हजार मेरेन दंड दिवन तांचे कडल्यान 12,500 रुपया दंड म्हामंडळान वसूल केलो. ब्लॅक स्पॉट उणे करपा खातीर लोकां मदीं जागृताय करून भौशीक सुवातेर नदर दवरप हो मोहिमेचो उद्देश आसलो. तशेंच हो कोयर रस्त्यार उडोवचो सोडून आपली पंचायत वा पालिके वरवीं ताचो विलो लावचो, असो अधिकाऱ्यान लोकांक उलो मारलो.
हाय वे नितळसाण उपक्रमा खाला हायवे वयलो कोयर एकठांय करून दवरपा खातीर आमी स्टेशनां उबारल्यांत. हो कोयर एकठाय जाले उपरांत म्हामंडळ प्रक्रिया करपा खातीर प्लांटांत धाडटात. पूण हीं स्टेशनां कोयर उडोवपाची सुवात असो गैरसमज करून लोक ह्या स्टेशनां भायर कोयर उडोवन मेकळे जातात. फक्त हायवे वयलो कोयर एकठांय करपाक हीं स्टेशनां उबारल्यांत, अशी म्हायती अधिकाऱ्यान दिली. गोंय कोयर वेवस्थापन म्हामंडळाचे सहाय्यक वेवस्थापक गजानन कामत, अभियंते क्रुपेश देसाय आनी गौरेश सावंत देसाय, पुलीस कॉन्स्टेबल तुकाराम वेळीप आनी युवराज अझारे, गोंय राज्य प्रदुशण नियंत्रण मंडळाचे कनिश्ठ पर्यावरण अभियंते सिध्दांत देसाय आनी बांदोडें पंचायतीचे सचीव कृष्णा गावडे हांणी ही कारवाय केली.
जिणेशैली बदल्ली, पूण मानसिकता मात ना !
वेळ बदलता तशी आमची जिणेशैली बदलल्या, पूण मानसिकता केन्ना बदलतली हाचेर अजून प्रस्नचिन्न आसा. अधिकाऱ्यान दिल्ले म्हायती प्रमाण 9 लाखांची पॉश गाडी घेवन एक मनीस आयलो आनी रस्त्यार कोयर उडोवन गेलो. ताका आडोवन दंड दिले उपरांत ताणें अधिकाऱ्यां कडेन केस्तांव करपाक सुरू केलें. 9 लाखांची गाडी घेवन मिरयतात हें बरें आसा, पूण ही जीण जगतना सैमा कडेन आपली लागणूक आसा, हाचो मात कोणूच विचार करिनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
