भांगरभूंय | प्रतिनिधी
-दोंगराळ वाठार केबलां वरवीं जोडल्यार गोंय पर्यटनाचें मुखेल केंद्र जावये
– सध्या महाराजांच्या किल्ल्याच्या नुतनीकरणाचें काम चालू
-फुडल्या वर्सा मेरेन प्रधानमंत्र्या हस्तुकीं लोकांर्पण करपाचो यत्न
फोंडेंः फर्मागुडी, मर्दनगड आनी सिद्धनाथ पर्वत हे दोंगराळ वाठार केबलां वरवी जोडले जाल्यार गोंय पर्यटनाचे मुखेल केंद्र जावंक शकता. छत्रपती शिवाजी महाराजाचो किल्लो 1977 वर्सा तेन्नाची मुख्यमंत्री शशिकला काकोडकार सरकारान उबारून लोकार्पण केल्ले. फुडल्या वर्सा किल्ल्याक 50 वर्सां पुराय जातली. सध्या छत्रपती शिवाजी महाराजाच्या किल्ल्याचें नुतनीकरणाचें काम चालू आसा. फुडल्या वर्सा मेरेन हें काम पुराय करून प्रधानमंत्री नरेंद्र मोदी हांचे हस्तुकीं लोकांर्पण करपाचो यत्न करतले अशें वीज मंत्री सुदीन ढवळीकार हांणी स्पश्ट केलां.
शिवजयंती निमतान फर्मागुडी हांगा म्हायती आनी प्रसिध्दी खात्यान आयोजीत केल्ल्या कार्यावळींत वीज मंत्री सुदीन ढवळीकार उलयताले.
पयलीं वीज मंत्री सुदीन ढवळीकार हांणी छत्रपती शिवाजी महाराजाच्या पुतळ्याक फुलां हार अर्पण केलो. त्या वेळार मगो पक्षाचे अध्यक्ष दीपक ढवळीकार, प्रा. कृष्णाजी कुलकर्णी, नगराध्यक्ष वीरेंद्र ढवळीकार, जिल्हाे पंचायत वांगडी गणपत नायक, सरपंच सुखानंद कूर्पासकर, संचालक दीपक बांदेकार, नगरसेवक रितेश नायक, उपसरपंच चित्रा फडते आनी थळावे पंच रामचंद्र नायक हाजीर अाशिल्ले.
छत्रपती शिवाजी महाराजांनी हिंदवी स्वराज्यांत व्हड योगदान दिलें. छत्रपतींच्या इतिहासाची यादूय फुडारांत लेगीत फुडली पिळगी निश्चीत करतली. कारण छत्रपती शिवाजी महाराज हे लोकांचे राजा आशिल्ले. ताका लागून, छत्रपती शिवाजी महाराजाचो आदर्श घेवन सगल्यांनी देशाच्या हिता खातीर मुखार येवप गरजेचें अशें वीज मंत्री सुदीन ढवळीकार हांणी सांगलें.
प्रा. कृष्णाजी कुलकर्णी हांणी छत्रपती शिवाजी महाराज हांचे विशीं हाजीर अाशिल्ल्यांक व्याख्यान दिले.
ह्या वेळार हायस्कुलांतल्या विद्यार्थ्यां खातीर एक खाशेली सर्त आयोजीत केल्ली. संचालक दीपक बांदेकार हांणी येवकार दिलो आनी उपसंचालक पंकज मराठे हांणी सगळ्यांचे उपकार मानले. गिरीश वेळगेकार हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
