भांगरभूंय | प्रतिनिधी
शिवमोगी बेजारः किल्ल्याची दुरुस्ती करपाची मागणी
भांगरभूंय । प्रतिनिधी
फोंडें: फर्मागुडयेर छत्रपती शिवाजी महाराजांच्या किल्ल्याचे वण्टीचो भाग सोमारा सांजे वेळार कोसळ्ळो. दोन वर्सां आदीं तेच सुवातेर वणत कोसळिल्ली. दुरुस्ती करूंक नाशिल्ल्यान किल्ल्ल्याचे उरिल्ले वण्टीचो भाग कोसळ्ळो. फोंडें वाठारांतल्या शिवमोगींनी नाराजी उक्तावन सरकारान किल्ल्याचे दुरुस्ती खातीर यत्न करपाची मागणी केल्या.
फर्मागुडये वयलो हो किल्लो पर्यटकांक आकर्शीत करता. फोंडें म्हालांत आशिल्ल्या विवीध नामनेच्या देवळांनी येवपी पर्यटक शिवरायांच्या किल्ल्याक मुजरत भेट दितात. फाटल्या कांय वर्सां सावन किल्ल्याच्यो वण्टी कोसळपाचे प्रकार परतून परतून घडत आसात. कोसळिल्ले वण्टीची दुरुस्ती वेळावेळार जायना. दर वर्सां शिवजयंती मनोवचे खातीर लाखांनी रुपयांची उलाढाल करतात. शिवजयंतीचे कार्यावळींत जाल्यार हाजीर आशिल्ल्या शिवमोगींक ह्या किल्ल्याची दुरुस्ती करपाचें आस्वासन हाजीर रावरी मंत्र्यां कडल्यान चुकनासतना मेळटा. पूण अजून मेरेन सोबितीकरण करपाची प्रक्रिया सुरू करूंक ना, अशें शिवमोगींचें म्हणणें आसा.
बांदोडेंचे आदले सरपंच राजेश नायक हांणी सांगलें, सरकाराक छत्रपती शिवाजी महाराजांच्या किल्ल्याचो उगडास फक्त शिवजयंती दिसाच येता, ते उपरांत किल्ल्या कडेन आडनदर करता. फाटल्या कितल्याशाच वर्सां सावन सरकार शिवमोगींक किल्ल्याचें सोबितीकरण करपाचें आस्वासन दिता. मंत्र्यांनी आस्वासनां दिवचे परस छत्रपतींचें अस्तित्व तिगोवन दवरचे खातीर ठोस कृती करून दाखोवपाची गरज आसा. फर्मागुडये वयल्या छत्रपतींच्या किल्ल्याची दुरुस्ती करून पर्यटकां खातीर सुविधा उपलब्ध करून दिवपाची गरज आसा. फाटल्या कितल्याशाच वर्सां सावन सरकारांतल्या मंत्र्यांनी सोबितीकरणाच्यो घोशणा केल्यात. पूण अजून मेरेन सरकार किल्ल्याचे देखरेखी खातीर गंभीर ना, अशेंच दिसता. फोंडें म्हालांत सध्या चार मंत्री आसात. पर्यटनाक संद दिवचे खातीर मंत्र्यांचो आदार अपेक्षीत आसा. येता ते शिवजयंती मेरेन छत्रपतींच्या किल्ल्याचे दुरुस्तीच्या कामाक सुरवात करपाचो यत्न सरकारान करचो, अशी शिवमोगींची मागणी आसा.
किल्लो पंचायती कडेन दिवचोः सरपंच
दर वर्सा शिवजयंती मनोवचे खातीर किल्ल्याची दुरुस्ती करतात. ते उपरांत किल्ल्या कडेन लक्ष दिनात. किल्ल्याच्यो वण्टी कोसळपाचे प्रकार फाटल्या कांय वर्सां सावन चल्ल्यात. देखभाल करचे खातीर किल्लो थळावे पंचायती कडेन दिवपाची मागणी हे आदींच पर्यटन खात्या कडेन केल्ली. पूण ते संबंदांत अजून सकारात्मक विचार जावंक ना, अशें बांदोडेंचे सरपंच सुखानंद कुर्पासकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
