फर्मागुडयेर आयआयटीचे इमारतींत बॉम्ब दवरिल्ल्याचो ई-मेल बनावट
भांगरभूंय | प्रतिनिधी
फोंडें, प्रतिनिधी: फर्मागुडयेर आयआयटीचे इमारतींत बॉम्ब दवरिल्ल्याचो ई-मेल फोंडे पुलिसांक मेळिल्ल्यान सगळ्याक खवदळ जालो. फोंडेंचे उपअधीक्षक शिवराम वायंगणकार, निरीक्षक विजयनाथ कवळेकार हांणी आयआयटी आनी हेर वर्गांत शिक्षण घेवपी इमारतींतल्या विद्यार्थ्यांक भायर काडले. बॉम्ब निकामी करपी पंगडान गोंय अभियांत्रिकी महाविद्यालयाच्या वाठारांत सोद घेतलो. मात कांयच सांपडूंक ना. ताका लागून बॉम्ब आशिल्ल्याचो आयिल्लो तो ई-मेल बनावट थारलो.
पुलिसांनी दिल्ले म्हायती प्रमाण, बिरेस्तारा फांतोडेर सुमार ४ वरांचेर आयआयटींत बॉम्ब आशिल्ल्याची ई- मेल कार्यालयाक मेळ्ळो. सकाळीं १०.३० वरांचेर आयआयटीच्या अधिकार्यांनी फोंडें पुलिसांक हे विशीं म्हायती दिली. ते प्रमाण पुलीस पंगड महाविद्यालया कडेन दाखल जाले. पुलिसांनी रोखडेंच आयआयटी इमारतींत रावपी विद्यार्थ्यांक भायर काडले. उपरांत बॉम्ब निकामी करपी पंगडान सोद घेतलो. तेन्ना उपजिल्लोधिकारी शुभंम नायक, मामलेदार राजेश सांखळकार, फोंडें पुलीस उपअधीक्षक शिवराम वायंगणकार, निरीक्षक विजयनाथ कवळेंकार, उजो पालोवपी दळाचे अधिकारी अजित कामत, सुशील मोरजकार आनी महाविद्यालयाचे अधिकारी हजर आशिल्ले. मात दनपार मेरेन बॉम्ब निकामी करपी पंगडाक कांयच मेळूंक ना.
फर्मागुडयेचे आयआयटी विद्यार्थ्यांची बिरेस्तारा दनपरां २ वरां सावन परिक्षा सुरू जावपाची आशिल्ली. ताका लागून सगळे फांतोडेर उठून अभ्यास करतात. दनपरां १ वरांचेर कॅन्टीनांत जेवण करून विद्यार्थी परीक्षा दिवपाचे तयारेंत आशिल्ले. मात सकाळीं सुमार ११ वरांचेर पुलिसांनी न्हिदिल्ल्या विद्यार्थ्यांक उठोवन भायर काडले. दनपरां १.३० वरांचेर बॉम्ब निकामी करपी पंगडान तपासणी करून सगळ्या विद्यार्थ्यांक आयआयटी इमारतींत प्रवेश दिलो. उपरांत विद्यार्थ्यांच्यो परिक्षा घेतल्यो.
कसलीय दुबाव घेवपा सारकी वस्त, रस्ताद पडिल्लें सामान सांपडल्यार रोखडेंच पुलिसांक कळोवपाचो उलो तांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
