भांगरभूंय | प्रतिनिधी
-ह्या प्रकरणांत दुबाविता आड गुन्यांव नोंदपणजी : तिसऱ्याच व्यक्तीची मालमत्ता घाण दवरुन आनी नामो वापरून वेवसायीक आनी वेगवेगळ्या प्रकाराचें रीण काडून कांदोळी फांट्याच्या कॅनरा बँकेचे 1 कोटी रुपयांचें लुकसाण केले. ह्या प्रकरणांत केंद्रीय गुन्यांव अन्वेशण विभागाच्या (सीबीआय) गोंय विभागान नीता वामन शेट्टीगर (सांताक्रूझ, तिसवाडी), शुभम दिपक नायक (धुळेर – म्हापशें) हाचे सयत अनवळखी कॅनरा बॅकेचे अधिकाऱ्या विरोधांत गुन्यांव दाखल केला. ह्या प्रकरणांत सीबीआयन सांताक्रुझ, धुळेर, कामुर्ली आनी हेर वाठारांनी धाड घालून म्हत्वाचें दस्तावेज जप्त केल्यात.
सीबीआयन दिल्ले म्हायती प्रमाण, ह्या प्रकरणांत कळंगूटच्या मारिया लोबो हांणी 19 सप्टेंबर 2024 दिसा कागाळ दाखल केल्ली. ते प्रमाण, लोबो उमटावाडो-कळंगूटे शानिया कॉर्नर वायन शॉप ह्या नांवान वेवसाय करतात. ऑगस्ट 2024 त तांच्या विरोधांत कॅनरा बॅकेचे विभागीय वेवस्थापकां कडल्यान 6 नोटीस जारी केल्यो. तांणी कॅनरा बॅकेच्या कांदोळी फांट्या कडल्यान वेवसायीक आनी हेर वेगवेगळे रीण घेतिल्ल्यान तांकां विलफुल डिफॉल्टर म्हूण घोशीत करून तांचें बँक खातें बंद करतले अशी म्हायती दिली. तशेंच नोटीसी प्रमाण, 10 दिसांत रक्कम फारीक करूंक ना जाल्यार तांचे दुकान जप्त करून कारवाय करपाची शिटकावणी दिल्ल्याची कागाळ नमूद केली. ते भायर संबंदीत कागाळदारांनी वयले यंत्रणे सयत कॅनरा बँकेच्या कांदोळी फांट्यात चवकशी केली तेन्ना तांकां कसल्याच प्रकाराचे सहकार्य करपाक न्हयकार दिल्ल्याची म्हायती कागाळेंत नोंद केल्या. तेच प्रमाण कागाळदारांनी वयले कॅनरा बँकेंत कसल्याच प्रकाराचे रीण वा ताची मालमत्ता घाण दवरूंक नाशिल्ल्याची म्हायती दिली.
ह्या प्रकरणांत सीबीआयचे अतिरिक्त अधिक्षक टी. संतोषकुमार हांच्या मार्गदर्शना खाला निरिक्षक स्नेहा साहनी आनी हेर पंगडान वयल्या कागाळेची दखल घेयवन मुळावी चवकशी केली. तातूंत कॅनरा बँकेच्या कांदोळी फांट्यांतल्या अधिकाऱ्यांनी खाजगी व्यक्तींनी कट रचून मारिया लोबो हांच्या आस्थापनाचो पत्तो वापरून आनी मालमत्ता घाण दवरली. तशेंच बनावट दस्तावेज तयार करून वेगवेगळ्या प्रकारचे रीण घेतिल्ल्याचे मुखार आयले. ते खातीर नीता वामन शेट्टीगर( सांताक्रूझ) आनी शुभम दीपक नायक (धुळेर) ह्या दोगांयनी बँक अधिकाऱ्यांच्या मजतीन शानिया कॉर्नर वायन शॉप ह्या आस्थापना खातीर 28 फेब्रुवारी 2020 दिसा 25 लाख रुपया रीण मंजूर केले. 22 जुलय 2022 दिसा वयले रीण आनी कळंतर मेळून 34.88 लाख रक्कम जाली. ते उपरांत शुभम वायर स्टोर ह्या अास्थापना खातीर 19 सप्टेंबर 2020 दिसा 25.88 लाख रुपया रीण घेतले. ते उपरांत आयुश राज मेडिकला खातीर 34.60 लाख रुपयांचें रीण घेतले. ते भायर नीता शेट्टीगर हांणी वाहन खरेदी खातीर वयल्या फांट्यांतल्यान 5 लाख रुपया रीण घेतिल्ल्याचे सीबीआयच्या तपासांत मुखार आयलें.
ते प्रमाण निरिक्षक स्नेहा साहनी हांणी शेट्टीगर आनी नायक हांचे सयत अनवळखी बँक अधिकाऱ्या आड भादंसंच्या विवीध कलम आनी भ्रश्टाचार प्रतिबंधक कायद्याचें कलम 7 खाला गुन्यांव दाखल केला. ह्या प्रकरणातं सीबीआयन वल्या दुबावितांच्या सांताक्रूझ, धुळेर, कामुर्ली आनी हेर सुवाते वयल्या आस्थापनांनी धाड घालून म्हत्वाचें दस्तावेज जप्त केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
