फटीचो इतिहास निर्माण करपाचो यत्न

भांगरभूंय | प्रतिनिधी

म्हजें मत

पुर्तुगेज काळांत जेजुयत धर्मगुरुंचें गोंयकारां वांगडा मोगाळ संबंद आसले हें इतिहासीक असत्य मोडून, तोडून गोंयच्या इतिहास अज्ञानी पिगळ्यां सामकार दवरपाक पर्वरीचें सेंट फ्रान्सीस झेवियर संशोधन केंद्र एक पुस्तक प्रकाशित करता. ‘द जेजुयट, गोवा आनी कला’ हें त्या पुस्तकाचें नांव! जेजुयट पाद्रींनी  कला आनी संस्कृतायेच्या मळाचेर खंय ‘अपूर्व’ अशें योगदान दिलां. तें झेवियर संशोधन केंद्रान लोकां मुखार हाडपाचें थारायलां. 

इग्नेशियस लाॅयोला हांणी ‘सोसायटी ऑफ जीजस’ ही संस्था स्थापन केली. फ्रान्सीस झेवियर हो तांचो मुखेल वांगडी आशिल्लो. हे संस्थेंतल्यान शिकून जे भायर सरतात तांकां जेजुयत म्हणटात. 

युरोपांत जेजुयत उतराचो अर्थ फटींग, कपटी असो दिला. ख्रिस्ती पंथाचो स्वीकार करीनाशिल्ल्यांक इन्क्विजीशनाच्या नांवा खाला मारप्यांत ह्या धर्मगुरुंचो युरोप, आशिया, अमेरिका आनी आफ्रिका ह्या चार खंडांत फुडाकार आशिल्लो, ताची इतिहास साक्ष आसा. ही इन्क्विजीशन यंत्रणा गोंयांत हाडून 252 वर्सां गोंयकार हिंदू आनी नवक्रिस्तांव ह्या आमच्या पुर्वजांचेर तांणी क्रूर अत्याचार केले. जेजुयतांच्यो पवित्रतायेच्यो कल्पना कितल्यो विकृत आसल्यो, ताका इतिहास साक्ष आसा. 

1774 ते 1778 ह्या काळांत खुद्द पुर्तुगालांत उदारमतवाद्यांची सत्ता आयली. मार्केश द पोंबाल हे पुर्तुगालाचे प्रधानमंत्री आशिल्ले. तांणी जेजुयटांचें ‘इंक्विजिशन’ बंद केलेंच, पूण ह्या मनीसपण विसरिल्ल्या जेजुयतांक गोंयांतल्यान धांवडायले. क्रिस्ती लोकांक पसून जेजुयतांच्या करण्यांचो त्रास जातालो. 

आतां पुर्तुगेज कशे मोगाळ आशिल्ले. तांणी गोंय कशें सुसंस्कृत केलें, हाचो फटीचो इतिहास बरोवपाचें काम चालूच आसा. आतां नव्या पिळग्यांची दिशाभूल करपी नवो इतिहास मुखार येता. ‘द जेजुयट, गोवा आनी कला’ हें पुस्तक उजवाडाक येवपाचें आसा. आमचो भारत म्हणजे धर्मशाळा जाल्या. कोणेंय येवचें आनी तकलेर कुट मारून वच्चें. 

प्रा. सुभाष भास्कर वेलिंगकार

79727 29769