भांगरभूंय | प्रतिनिधी
गांवकारांचो आरोपः थिवी कोमुनिदाद पदाधिकाऱ्यां आड कोलवाळ पुलिशेंत कागाळ
भांगरभूंय । प्रतिनिधी
म्हापशें: थिये पुणेचे एमआयटी संस्थेक खाजगी विद्यापिटा कातीर 2 लाख चौखण मिटर कोमुनिदादीची जमीन दिवपाच्या प्रकरणांत फटींगपणां आनी बनावटगिरी केल्ल्या प्रकरणांत गांवकार आनी थळाव्या लोकांनी कोमुनिदादीच्या पदाधिकाऱ्यां आड कोलवाळ पुलिशेंत कागाळ दाखल केल्या.
कोमुनिदाद अध्यक्ष मिंगेल सिक्वेरा, अॅटर्नी जेम्स डिसोझा, भांडारी जेसलन परेरा आनी इस्क्रिवाव प्रणव पार्सेकार हांचे आड ही कागाळ दाखल केल्या. संबंदितांचेर भा.दं.सं.च्या साबार कलमां खाला गुन्यांव नोंद करून चवकशी करची, अशी मागणी पुलिशे कडेन केल्या.
थिये दोंगुल्लेचेर प्रस्तावीत ह्या खाजगी विद्यापिठा आड फाटल्या कांय म्हयन्यां सावन गांवचे लोक आनी कोमुनिदाद गांवकारांनी आंदोलनाचो मार्ग आपणायला. बुधवारा 4 डिसेंबराक दनपारां हळदोणेंचे आमदार अॅड. कार्लुस फेरेरा हांचे हाजिरेंत थिवी कोमुनिदाद गांवकार आनी थळाव्या लोकांनी पुलीस निरिक्षक विजय राणे हांचे कडेन लेखी कागाळेची प्रत दिली.
डग्लस सिक्वेरा, गॉडफ्री डिलिमा, जोस डिमेलो, लॉरेन्स फेर्राव, आंतोनिओ फोन्सेका, आद्रियन डिसोझा, अॅस्सूंप्शन डिसोझा, ब्राझ डिसोझा, जोनाथन डिमेलो, मातियस लोबो, हायगिनस डिसोझा, मेलिस्सा फर्नांडिस ई कुलासो, अँजेलिना फेर्राव, मोल्ली दा सिल्वा, रॉबर्ट कुलासो, माधव पाटील, पांडुरंग पाटील, नेल्सन पेस आनी सेबेस्तियन डिसोझा हांणी एकवटींत कागाळ दाखल केल्या.
कोमुनिदादीचे जमनीचे फटीचे दस्तावेज तयार केले आनी जाणा जावन हें दस्तावेज खरे म्हूण सादर केले. तशेंच पावणे बगर जमीन मंजूर करचे खातीर सरकाराची दिशाभूल केली आनी पुणेचे एमआयटी ग्रूप इन्स्टिट्यूटाच्या महाराष्ट्र अभियांत्रिकी आनी शिक्षणीक संशोधन अकादमी (एमएईईआर) हे संस्थेक कोमुनिदादीची 2 लाख चौखण मिटर जमीन खाजगी विद्यापीठ उबारपाक दिली, अशें कागाळेंत म्हणलां.
25 फेब्रुवारी 2024 ह्या दिसा जाल्ले कोमुनिदादीचे साबार बसकेचें बनावट इतिवृत्त तयार केल्ल्याचो कथीत आरोप दुबावीत पदाधिकारी आनी कर्मचाऱ्यांचेर हे कागाळेंत केला.
साबार बसकेचें हातान बरयल्ले इतिवृत्त वाचपा सारकें ना आनी टायप केल्ल्या इतिवृत्ता परस वेगळें आसा. तें कायद्या खाला गरजे प्रमाण कोमुनिदाद प्रशासका कडेन सरकारी मान्यताये खातीर सादर करूंक ना. जमनीचे दर आनी ठेवींच्यो अटी नमूद करून हातांत बरयल्ल्या इतिवृतांत विशिश्ट परिच्छेद फटींगपणा करून घातल्यात, असोय दावो कागाळदारांनी केला.
आमदार अॅड. कार्लुस फेरेरा हांणी सांगलें, थिवी कोमुनिदादीचे साबार बसकेंत इतिवृत्ताचे दोन संच वेवस्थापकीय समितीन तयार केले. टायप केल्लें इतिवृत्त प्रकल्प प्रशासकांक धाडले जाल्यार दुसरें हातांत बरयल्ले इतिवृत्त सरकाराच्या महसूल खात्याक धाडले, असो आरोप तांणी केलो.
हे जमनीचे हस्तांतरण रद्द करचे खातीर गांवकार सरकाराक निवेदन सादर करतले. तशेंच गरज पडली जाल्यार न्यायालयांत वतले. तशेंच पुलिसांनी गुन्यांव नोंद करपाक कळाव केलो जाल्यार लेगीत न्यायालयांत वतले, अशें अॅड. कार्लुस फेरेरा हांणी स्पश्ट केलें. सरकारी फायलीचेर हे जमनीचो दर दरेका चौखण मिटराक 3 हजार रुपया आसा. ते प्रमाण 2 लाख चौखण मिटर जमनीचो दर 69 कोटी रुपया जाता. मात दर आनी 5 कोटी रुपया जमा रकमेच्या इतिवृत्तांत कांयच बरोवंक ना. पूण तातूंत अध्यक्षान तांकां बऱ्यांतलें बरें मोल मेळटलें आनी कोमुनिदादीक फायदो जातलो, अशें नमूद केलां, अशें अॅड. कार्लुस फेरेरा हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
