भांगरभूंय | प्रतिनिधी
तुका म्हणे थीता आपणची खोटा।
अपमान मोठा पावईल॥
तुकाराम महाराजांची ही ओळ सादी आसा, पूण ती जिणेंतल्या सगळ्यांत कठीण अणभवा कडेन बोट दाखयता — फट उलोवपाक लागून निमणो जावपी अपमान.
फट उलयतना खिणभर दिसता “काम जातलें… तुका आनी कोण धरतलो?” पूण सत्याचें एक वेगळें तत्व आसा. तें रोखडेंच वा फुडें भायर येताच आनी मागीर मुखार येताना मनशाचो जाल्लो अपमान दुप्पट त्रास दिता — फट उलोवपाची रुखरुख, आनी आपली प्रतिश्ठा व्हगडावपाचें दुख्ख.
ह्यू ग्लास, अमेरिकेंतलो एक नामनेचो फ्रंटियरमॅन — शिकारी, संशोधक आनी सर्वायवल एक्स्पर्ट. 1823 वर्सा ताचेर एका क्रूर वांश्वेलान हल्लो केलो. तो अर्दवट मेल्लो. ताणें आपल्या दोग वांगड्यांक ताची जतनाय घेवपाक सांगलें, पूण भंयान तांणी “ग्लास मेलो” अशी फट मारली आनी ताका थंयच सोडून दिलो.
त्या खिणाक ही फट म्हायती दिवप तांकां सोंपें आनी सुरक्षीत आशिल्लें. पूण फुडें कितें जालें?
ह्यू ग्लास जिवो उरलो. आनी जखमी अवस्थेंत — ३२० किमी. अंतर सरपटत, दिमखुऱ्यांनी चलत, कसली तरी मजत घेत जिद्दीन प्रवास करीत परत छावणेंत पावलो.
फट उलयिल्ल्यां खातीर हो व्हडलो धपको आशिल्लो. लोकांचे नदरेंत तांचें नांव पडलें. तांची प्रतिश्ठा ना जाली. तांणी स्वताची राखण करपा खातीर सांगिल्ली फट, उरफाटें तांच्या जिवितांतल्या सगळ्यांत व्हडल्या अपमानाचें कारण थारलें.
आमचे कडेनूय अशे अणभव आसतात —
एक भुरगो म्हणटा, ताणें आपलो गृहपाठ करूंक नाशिल्ल्यान “आपली काॅपी शेणली” आनी दुसऱ्या दिसा ताचो इश्ट ताका ती दाखयता.
ऑफिसांतली चूक लिपोवपा खातीर फट सांगतात, पूण एका ईमेलांतल्यान सगळें उक्तें जाता.
घरांत एक गजाल लिपयली, आनी पुराय काणी ल्हानश्या तपशीलाक लागून भायर सरता.
सत्य सांगिल्लें जाल्यार ख्यास्त उणी आसूं येताली; पूण फट धरल्यार अपमान चड जाता.
सत्य मनशाचेर वजें घालना — ताका हलको करता.
ह्यू ग्लासाची काणी आमकां शिकयता की सत्य केन्ना केन्ना कठीण आसता, पूण निमाणें फट निश्चीतपणान वजें जाता.
फटींग मनशाक संवसाराक तोंड दिवंक मेळना. पूण सत्य सांगपी मनशाची मान सदांच उंच उरता.
तुकाराम महाराजांच्या एका ल्हान ओळींतल्यान हो व्हडलो धडो — फट सांगप म्हणल्यार तात्पुरतें पळून वचप अशें दिसता, पूण निमाणें फकत अपमानच हाताक लागता.
आनी देखून, सत्य केन्नाच लिपोवंक नाकात.
– देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
