भांगरभूंय | प्रतिनिधी
प्रेम, मोग, प्यार, इश्क, मुहब्बत, लव्ह म्हणल्यार कितें? तर एकमेकां विशीं आदर, आपलेंपण, विस्वास, हुस्को, सहानुभूती, त्याग, तडजोड अशा साबार भावनांचो आपरोस. मोगाक जात, धर्म, पिराय, प्रांत, रंग हांचें बंधन लागना.
तो सर्वव्यापी. मोग आसता खूब तरांचो. आवय- पूत, भाव- भयण, बापूय- चली, मनीस- प्राणी… पूण प्रेम म्हणलें काय सगल्यांच्या दोळ्यां मुखार पयलीं येता, तें जोडपें. मोगी आनी मोगिकेचें. (कांय जाण नाग – नागिणी सारकें तिका मोगीणूय म्हणटात.) संवसारांतल्या साहित्यांत सगल्यांत चड खंयच्या विशयाचेर बरयलां आसत, तर तें मोगाचेर. 99 टक्के सिनेमाय मोगाचेरुच आसतात. भारतीय शायरीचो पेलोय मोगान उपाट भरून व्हांवता. ए इश्क, मुझे अब और जख्म चाहिए, मेरे शायरी में अब वो बात नही रही, अशें शायर म्हणटा. इतलो तो मोगान पिसो जाला. पूण हे जख्म म्हणल्यार शारिरीक घावे न्हय. पुणेंच्या राहुल हंडोरेन केले तसले. ताणें आपले कडेन लग्न जायना म्हूण दर्शना पवार हे आपले इश्टीणीचो खून केलो, असो दुबाव आसा. ताचो तिचेर मोग आसलो, पूण तिचोय आशिल्लो काय ना तें आतां पुलीस सोदतात. दर्शना ही महाराष्ट्र लोकसेवा आयोगाचे परिक्षेंत राज्यांत तिसरी आयिल्ली. फुडल्या 2- 3 म्हयन्यांत ती अधिकारी जावपाची. राहुलय हेच परिक्षेक बशिल्लो. दर्शनाचें लग्न थारिल्ल्यान तो अस्वस्थ जाल्लो. आपूण परिक्षा पास जातकच अधिकारी जातलो, अशें ताणें तिच्या घरच्यांक सांगिल्लें. ल्हानपणा सावन तो तिका वळखता. पुण्यां सत्कार सुवाळ्या खातीर ती इश्टीणी कडेन आयिल्ली. थंय राहुल आयलो. दोगांय राजगडाचेर फिरपाक गेलीं आनी उपरांत…. दर्शनाची कूड राजगडा सकयल मेळ्ळी. तिचें दुसऱ्या कडेन लग्न थारिल्लें. अधिकारी जावपाचेंय तिचें सपन आशिल्लें. पूण मनीस चिंत्ता तें सगलेंच जाता अशें ना. दर्शनाचीं सगलीं सपनां फुलांच्या पाकळ्या वरीं पिश्टून मातये भरवण जाली.
मोगाक लागून खून, मारामारी जावपाचे प्रकार नवीन न्हय. मोगान पिशे जाल्ल्या तरणाट्यांनी हांव नाका, तर दुसरो कोणूच नाका, हे तिडकीन चलयांक मारून उडयिल्लीं आसात. हालींच दिल्लींत 19 वर्सांच्या चल्यान 16 वर्सां पिरायेचे चलयेची भर रस्त्यार हत्या केल्ली. आमच्या गोंयांतूय घरांत वचून चाकवान मोगीकेचेर हल्लो करपाचे प्रकार घडल्यात. लग्न जातकच मांवाचो खूनय करपी मोगी आसात. एकल्यान तर मोगाच्या जाळ्यांत फारावन 16 चलयांचो खून केल्ल्याचो आरोप आसा. तीन आरोप सिद्ध जाल्यात. हो मोग न्हय. ही विकृत, विक्षीप्त, शिर फाल्त मनशाची सुवार्थी कर्तुबां. फकत चलेच न्हय तर चलयोय मोग करून वाजेलीं काय बरोसो चलो पळोवन ताचे कडेन लग्न जातात आनी आदल्या मोगीक वाऱ्यार सोडटात. मोगांत खंय त्याग आसता. पूण तो चडसो सिनेमांनी पळोवंक मेळटा. रोमियो- ज्युलिएट, हिर – रांझा, शिरी- फरहाद…. हीं गाजिल्लीं मोगी जोडपीं. आतांचे सारको तांचो मोग सुवार्थी नाशिल्लो.
मोबायल फोनाक लागून आतां एकमेकां कडेन संपर्क करप, तांकां मोगाच्या जाळ्यांत ओडप, फारावप खूब सोंपें जालां. सिनेमाचोय प्रभाव आसता. फाटीं दोन चलयो फाटलो फुडलो विचार करीनासतना भांगराच्या वस्तीं सयत पळून हुबळी गेल्ल्यो, हें सगल्यांकूच खबर आसा. समाजांतल्या कांय अपुरबुद्द भुरग्यांक आपूण कितें करता, ताचें भान, समज नासता. फक्त लग्ना पयलींच न्हय, तर लग्ना उपरांतूय मोगाचो फार जावंक लागला. गोंयांत फाटल्या अडेज वर्सांत 50 जाणांनी घटस्फोट घेतला. मोबायल फोनाक लागून प्रत्यक्ष संवाद सोंपला, नाका जाल्लो आभासी संवाद सुरू जाला. नोकरी, धंद्या मुखार कोणाक एकमेकांच्या सहवासांत रावपाक वेळ मेळना जालां. हे बाबतींत समुपदेशकांक फुडाकार घेवचो पडटलो. शाळा- काॅलेजांनी वचपी आपल्या भुरग्यांचेर पालकांक (आनी शिक्षक, समाजाकूय) लक्ष दवरचें पडटलें. आपलो मोग यशस्वी जावंक ना, जाल्यार मन घट्ट करून वेगळी वाट धरपाक जाय. खून, मारामारी करप, मनाचेर जीणभर परिणाम करून घेवप, हे ताचे वयले उपाय न्हय.
साहिर लुधियानवीनूय म्हणलां, वो अफ़्साना जिसे अंजाम तक लाना न हो मुमकिन, उसे इक ख़ूब- सूरत मोड़ दे कर छोड़ना अच्छा….!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
