भांगरभूंय | प्रतिनिधी
गोंयांत तीन मनशांचो संवसार चलोवपाक उणीच रु. तीस हजार पगाराची तरी नोकरी जाय. हांगा म्हारगाय वाडल्या, कुटुंबाच्यो गरजोय आदले परस चड, काळा प्रमाण मनशांच्यो संवयी बदल्ल्यात. आतां कुटुंबांतल्या सगल्यांकूच चंगळवाद आवडटा. आदले सारके मन मारून जगपी, हांतरुण पळोवन पांय पसरावपी, जोडकाराक समजून घेवपी घरचीं नेटान उणीं जायत आसात. दरेके गजालींत लोकां कडेन सर्त करपी वाडल्यात, जांव तें मागीर लग्न, बारसो, वाडदीस…..!! देखून जो- तो चडांत चड पगार मेळटलो अशी नोकरी सोदीत आसता. अर्थांत तातूंत चुकीचें कांय ना. चडशे सरकारी नोकरी सोदतात. ताचे फाटलीं कारणां खूब आसात. तीं सगल्यांक खबरुय आसात. मात ही सरकारी नोकरी मेळोवपाक थोडे लोक चुकीचीं पावला उबारतात आनी फटवतात. खुद्द आमच्या गोंयांत दर तीन म्हयन्यांनी ह्यो फटवणुकीच्यो घडणुको घडल्यात. संबंदीत गुन्यांवकारांक ताब्यांत घेतल्यात, अटक जाल्या, मागीर जामीन मेळ्ळा, थोडे फरारीय आसात.
सामकी ताजी गजाल सांगपाची जाल्यार, आपेव्हाळची. दोगा तरणाट्यांक सरकारी नोकरी दिवपाचें हांयस दाखोवन एके 39 वर्सांचे बायलेन 14 लाख रुपया घेतले. कांय वर्सां तांकां आस्वासनां दिवन झेलयत दवरले. अखेरेक तांणी पुलिशेंत कागाळ केली आनी हे बायलेक अटक जाल्या. तिचें नांव पुजा. हाचे पयलीं दिवचल पुलीस स्टेशनाचेर अशीच एक कागाळ आयिल्ली, ते बायलेचें नांव खंय प्रिया. ठकसेन हे चडशे दादलेच आसतात. मात ह्या नोकरी दितां अशें सांगून फटोवपाच्या मळार बायलोय दादल्यांच्या खांद्याक खांद लावन वावुरतना दिसतात. दिवचल प्रकरणांतले बायलेचो साथीदार पुलीस आशिल्लो. ताका अटकूय जाल्ली. ते बायलेन खंय गोड- गोड उलोवन कितल्याशाच बायलांक, दादल्यांक फटयिल्ले. तांकां, तांच्या भुरग्यांक रेल्वेंत नोकरी दितां अशें सांगून! ती लोकां कडल्यान उसने पयशे घेताली आनी तांकां वेळार व्याजा सयत फारीकुय करताली. म्हणटकच लोकांचो विस्वास बसलो आनी मागीर फुडली काणी घडली. लोकांनी वस्ती घाणाक दवरून पसून तिका पयशे दिल्यात खंय. ही रक्कम पांच कोटी रुपयां वयर आसा, असो फटवल्ल्यांचो दावो. आपेव्हाळचे बायलेचे कारनामे आयचे न्हय. तीय बऱ्याच वर्सां सावन ह्या मळार वावुरता. पुलीस चवकशेंत तिणें सरकारी नोकऱ्यो दिल्ल्याचेंय उक्ताडार आयलां. तशेंच बऱ्याच जाणां कडल्यान पयशेय घेतल्यात. सरकारी नोकरी दितां अशें सांगून 3 लाख घेवपी एका चिन्मयाकूय फाटीं म्हापश्यां धरिल्लो.
कोणूय आमच्या दारांत येता. आमकां सरकारी नोकरेचें आस्वासन दिता आनी आमी ताका लाखांनी रुपया दितात…. हें सोंपेपणी घडलां अशे दिसना. जांणी ह्या गुन्यांवकारांक पयशे दिल्यात तांची बारीकसाणेन चवकशी केल्यार आनीक सत्य उक्ताडार येतलें. म्हणल्यार त्या बायलांनी नेमकें कितें हांयस दाखयलें. कसले अर्ज भरले, कोणा कडेन व्हेले, वळख करून दिली वा फोनाचेर उलोवणी करून दिली…. तांणी सरकारी अर्ज, हेर फाॅर्मा बी हाडल्यांत जाल्यार तीं दिवप्यांचीय चवकशी जाल्यार बरी. जर कोणूय दारांत येवन आस्वासन दिता आनी ताका कोणूय हजार, लाख काडून दिता जाल्यार हाचे सारकीं दुसरीं मुर्खपणां आसचीं नात. हें त्या ठकसेनां पुरतेंच मर्यादीत आसा काय आनीक कोण गुन्यांवकार, राजकारणी बी हातूंत आसात जाल्यार तेंय तपासचें पडटलें. हीं प्रकरणां गाजतात आनी आठ दिसां भितर विरघळून नाच्च जातात. फक्त सरकारीच न्हय, तर आखाती देशांनी, अमेरिकेक, बोटीर, इंडोनेशिया, थायलॅण्डाक लाखांनी पगाराची नोकरी दिता अशें सांगून भारतीयांक फटोवपाच्यो घडणुको अंदूं घडल्यात. तातूंत कांय गोंयकारूय फटवल्यात.
सरकारी नोकरी पयशे घेवन कोण दितां अशें म्हणटा जाल्यार पुलिसांक सांगात, अशें मुख्यमंत्र्यान फाटीं म्हणिल्लें, पूण चडशे लोक पयलीं ओग्गी रावतात आनी बाबाय ना, पुडवेंय ना, अशें दिसतकच मागीर कागाळ करतात, हें चुकीचें. पयलींच सादूर रावल्यार ठकसेनांक धरप सोंपें जातलें. पयशेय वांचतले. कांय थारावीक सरकारी नोकऱ्यां खातीर (जंय लोकांचो थेट अधिकारी, कर्मचाऱ्यां कडेन संपर्क येता) 25, 40, 50 लाख रुपया पसून दिवपाक लोक तयार आसतात खंय. ताचे परस ते तो पयसो लघुउद्देग वा हेर कसल्याय वेवसायांत कित्याक घालीनात? वेवसाय केल्यार तुंच पात्रांव. दुसऱ्यांक नोकरीय दिवंक मेळटा. अमूक वेळार कार्यालयांत वचपाक जाय, रजा जाय… असले प्रस्नूय उरचे नात. सरकारी नोकरे खातीर स्वताच्या कुटुंबाचे वा रीण काडून हाडिल्ले पयशे दिवचे परस वेवसाय केल्यार बरो न्हय? तुमकां कितें दिसता?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
