भांगरभूंय | प्रतिनिधी
आयज 21 व्या शेंकड्यांत दादले आनी बायल हांचे मदीं भेद
दिसना. आयज दादल्यां वांगडा सगळ्या मळार बायलो
फुडाकार घेतात. बायलांक दादल्यां बरोबर नात अशें क्षेत्र ना. कला, खेळ, राजकारण, समाजीक वावर, अर्थशास्त्र, विज्ञान, तंत्रगिन्यान, शिक्षण, साहित्य अशा सगळ्या मळांचेर बायलां दादल्यां वांगडा खांदाक खांदो घालून वावुरतात, पूण समाजांत अजूनय बायलांचे उदरगतींत आडमेळीं हाडपी एक घटक आसा. आयज लेगीत तो बायलांक फकत ‘चूल आनी मूल’ हातूंत बांदून दवरूंक सोदता, देखून सनातनी विचारांचे हे प्रतिगामी लोक खंयच्या ना खंयच्या कारणाक लागून बायलांक सतत सोशल मिडियाचेर ट्रोल करतात. केन्ना केंसांचे स्टायली वयल्यान, तर केन्ना वेशभुशे वयल्यान. आयच्यो चलयो चल्यां भशेन कपडे घालतात, जीन्स, पॅंट, टीशर्ट घालतात, जीन्स पॅंट मांडयेक पिंजिल्ल्यो आसतात, ताचो सनातनी लोकांक राग येता आनी केन्ना केन्ना चलयांच्या नटप- मुरडपाचो
राग येता.
समाजांतले आदरणीय घटक लेगीत बायलांक ट्रोल करपाक फाटीं नात. बायलो धोंपरार पिंजिल्ल्यो जीन्स घालतात कित्याक, हे कसले संस्कार, असो प्रस्न उत्तरांचलच्या मुख्यमंत्र्यान भौशीक सभेंत विचारिल्लो. फकत हेच न्हय तर जायते जाण बायलांक तांच्या पोशाखाचेर आदारून लक्ष्य करतात. वास्तविक कोणे कसले कपडे वापरपाचे हो जाचो ताचो प्रस्न. भौशीक मळार फकत बायलोच जीन्स घालतात? दादलेय पिंजिल्ल्यो जीन्स घालतात. ते बर्म्युडा वा शॉर्ट पॅंट घालून गांवांत भोंवतात, पूण तांच्या कपड्याक कोणाक आक्षेप नासता. ताचो अर्थ दादल्यांक खंयचेय तरेचे कपडे घालूंक मेळटात, पूण बायलांक तें स्वातंत्र्य ना. बायलांक आपले आवडीचे कपडे घालपाक बंदी. फकत बायलांचेर निर्बंध कित्याक? बायलांक कितें घालचें तें थारावपाचो अधिकार दादल्यांक कोणे दिलो?
बायलांक कसले आनी कशे कपडे घालचे, बायलांनी खंय भोंवचें, कितें खावचें आनी कितें पियेवचें हें दादल्यांनी थारावचें ही तर अठराव्या शेंकड्यांतली मानसिकताय जाली. २१ व्या शेंकड्यांत लेगीत बायलांक समान हक्क मेळनात आनी तांकां आपल्या हक्कां खातीर झगडचें पडटा, हें दुर्दैवी.
दादले- बायल हांचे मदली समानताय ही फकत उलोवपा पुरती गजाल, अशें हे मानसिकतेंतल्यान दिसून येता. संवसाराचे एके वटेन बायलांक समान हक्क मेळचे म्हूण चळवळ सुरू जाता, जाल्यार बायलांक कशें जगचें, खंयचे कपडे घालचे, कशे कपडे घालचे हाचेर आमच्या देशांत चर्चा जाता. बायलांनी कशे आनी खंयचे कपडे घालचे हो प्रस्न न्हय, पूण प्रस्न तांचे निवड स्वातंत्र्य आनी मनीस हक्काचो. हे हक्क कोणेंच काडून घेवचे न्हय. कारण अजून तरी आमच्या देशांत लोकशाय आसा. बायलां धोंपराचेर पिंजिल्ली जीन्स घालतात, घट्ट कपडे घालतात म्हणून तांचेर लैंगीक अत्याचार जातात, असो युक्तीवाद कांय संकुचीत विचारांचे लोक करतात. बायलो सांजवेळा फिरपाक भायर सरतात म्हणून तांचेर बलात्कार जाता, असोय दावो तथाकथित संस्कृती राखणदार करतात. पूण आमच्या देशांत पुराय कपडे घाल्ले साठ -सत्तर वर्सां पिरायेचे बायलेचेर लेगीत बलात्कार जाता, हें ते सोयीस्करपणान विसरतात. विकृत मानसिकताय आशिल्ले लोकय पुराय कपडे घाल्ल्या बायलांक विकृत नदरेन पळयतात. ती पुराय कपडे घालून आसूं वा नासूं, जांची मानसीकताय विकृत आसा, त्या नराधमांक बायल म्हणजे एक भोगवस्तूच दिसता. बायलांच्या कपड्यांचेर टिप्पणी करचे बदला ही दादल्यांची मानसिकताय बदलली जाल्यार देशांत बायलांचेर जुलूम करपाच्यो घडणुको घडच्यो नात.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
