भांगरभूंय | प्रतिनिधी
अमेरिकेचे नवे अध्यक्ष डोनाल्ड ट्रम्प हांणी उद्देजक विवेक रामस्वामी आनी टेस्लाचे मुखेली एलाॅन मस्क हांची डिपार्टमेंट ऑफ गव्हर्नमेंट इफिशियन्सी म्हणल्यार DoGE चे प्रभारी म्हूण हालींच नेमणूक केल्या. ते सरकारी नोकरशाय मानसिकताय ना करून सरकारी पयसो वाटावपाचें काम करतले. हेच खातीर हो विभाग स्थापन केला खंय. मात, रामस्वामी आनी मस्क म्हणटात तें आयकल्यार लाखांनी लोकांक सरकारी नोकरी सोडची पडटली, अशीं चिन्नां दिसतात. हो सरकारी नोकरदारांक (थंय अमेरिकेचे नागरिक आसले बगर सरकारी नोकरी मेळना.) धपको दिवपी निर्णय. देश वाटावपा खातीर कामचुकार, दुयेंत वा गरज नासतना काम करपी चड कर्मचाऱ्यांक काडपाचें थारायलां अशें रामस्वामी हांणी जाहीर केलां. सरकाराचो खर्चूय उणो करपाचेर हें खातें काम करतलें. हाचेर हांगा काम करपी भारतीय नागरिकांची कितें प्रतिक्रिया येतात हें पळोवचें पडटलें. नागरीक नात ते भारतीय खाजगी मळाचेर काम करतात. पूण, तरीय तांकां फुडाराक भिरांत निर्माण जावं येता.
रामस्वामी हांणी म्हणलां, मस्क हातोडे सारकें न्हय, तर खरवती सारकें काम करतात. तांची ही पद्दत आमी नोकरशायेंत वापरतले. देश म्हूण आमी सोंपले, अशें चित्र संवसारांत उबें करपाचो यत्न जालो, पूण प्रत्यक्षांत म्हाका तशें दिसना. अमेरिकेचे अच्छ दिन येवपाचे आसात. एफडीए, अणु नियंत्रण आयोग आनी हेर एजन्सींनी चड कर्मचारी आसात. म्हणल्यार नाविन्य उणें, काम कमी आनी खर्च मात चड. हें देशाचे उदरगतीक बाधिकार हाडटा, अशेंय तांणी सांगलें.
मस्क आनी रामस्वामी हांणी डोजकास्टा विशीं म्हायती दिल्या. रिकामे जागेय जाहीर केल्यात. उच्च बुद्ध्यांक (आयक्यू) आशिल्ले लोक ते सोदतात. एक्साचेर टीक मार्क आशिल्ल्या संवसारांतल्या कोणाकूय ते खातीर एक्स हॅण्डला वयल्यानूच सीव्ही धाडूं येता. तांकां सप्तकांतल्यान 80 वरां काम करचें पडटलें. ह्या कामा खातीर पगार मेळचो ना. म्हणटकच, जांकां सल्लो दिवपाक, उपदेश करपाक आवडटा. जांच्या आंगांत राष्ट्रा विशीं खूब मोग, निश्ठा आसा, जे तन, मन, धनाचो त्याग करून विशिश्ट ध्येयान प्रेरीत जावन अमेरिका वयर काडपाक सोदतात, तांचे खातीर ही बेसबरी नोकरी! सुरवातेक नोकर कपात करून नवे हुशार मनीस भरतात, अशें सगल्यांक दिशिल्लें. मात खबरो आयल्यात, त्यो वाचल्यार हें आवाहन आपसेवकां खातीर, अशें दिसता. आमकां हजारांनी अर्ज आयल्यात, अशेंय मस्क हांणी जाहीर केलां.
संवसारांतले सगल्यांत हुशार लोक अमेरिकेंत आसात. थंय तांकां लाखांनी रुपया पगार मेळटा. अमेरिकेंत फक्त लायक व्यक्तीकूच नोकरी मेळटा. फाटीं भायल्या लोकांक लागून रोजगाराचेर परिणाम जाला, अशें मत उक्तावन अमेरिकेंत रावपी स्थलांतरीतांचेर थळाव्यांनी हल्ले केल्ले. भारतीय विद्यार्थ्यांक मरणूय आयिल्लें. प्रतिभावान लोकांक एकठांय हाडपाचो हो सरकाराचो प्रकल्प अशें रामस्वामी म्हणटात. पगारा बगर अमेरिकेंत काम करपाक भायले लोक वचत अशें दिसना. कारण, लोक थंय वतात, तेच मुळांत चड जोडपाक. तांचे गुणवत्तेचेरूच अमेरिका वयर सरल्या, अशें म्हणल्यार चुकीचें थारचें ना. म्हणटकच डोजकास्ट प्रकल्पाचें कितें जातलें वा तो फक्त लोकांची दिशाभूल करपा खातीर, तें कळना. आपलें म्हूण कितें जगावेगळें करपाची हौस तशी जायत्या जाणांक आसता.
अमेरिकेंत 55 लाखां परस चड भारतीय आसात. हो आंकडो अंदूंचो. सगल्यां परस चड भारतीय थंय रावतात. 43.6 टक्के उच्च पदांचेर काम करतात. तांत्रिक, विक्री, प्रशासनांत 33.2 टक्के आसात. थंय भारतीय दोतोरांचोच आंकडो पन्नास हजारां वयर आसा. 66 टक्के भारतीय स्थलांतरीत, जाल्यार 34 टक्के अमेरिकेंत जल्मल्ले. आमकां भारतीयांक तांचो कितलोय अभिमान दिसूं, पूण एकदां थंय गेल्लो सहसा परत येना. थंय जल्मल्लीं तांचीं भुरगींय तना- मनान अमेरिकन जातात. थंयची मानसिकताय, संस्कृती, विचार आपणायतात. अर्थांत कांय आडवाद आसतले. मस्क आनी रामस्वामींक जें काम दिलां, ताचे परिणाम कितें जातात, भारतीयांक ते माल पडटात, सरकारी नोकऱ्यो वतकच अमेरिकनांची
प्रतिक्रिया कितें आसतली, ही नोकर कपात फक्त देश वाटावपाक काय ताचे फाटल्यान कितें गुपीत उद्देश आसा??? अमेरिका पयस आसली तरी आतां विज्ञान, तंत्रज्ञानाक
लागून पांच सेकंदा भितर थंयचें सगलें कितें कळटा. वाट पळोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
