फक्त कॅप्टनानूच घेतलो कोंकणींतल्यान सोपूत

भांगरभूंय | प्रतिनिधी

श्रीपाद हांणी संस्कृतांतल्यान जाल्यार सदानंद हांणी घेतिल्लो मराठींतल्यान सोपूत

भांगरभूंय । प्रतिनिधी

पणजीः केंद्रीय मंत्री तशेंच उत्तर गोंयचे खासदार श्रीपापद नायक हांणी सोमारा लोकसभेंत संस्कृत भाशेंतल्यान सोपूत घेतलो. जाल्यार दक्षीण गोंयचे खासदार कॅप्टन विरियातो फर्नांडीस हांणी मात राजभास कोंकणींतल्यान सोपूत घेवपाक प्राधान्य दिलें. हे आदीं सदानंद शेट तानावडे हांणी राज्यसभेंत मराठी भाशेंतल्यान सोपूत घेतिल्लो. श्रीपाद नायक हांणी कोंकणी, मराठी सोडून संस्कृतांतल्यान सोपूत घेतिल्ल्यान खूब जाणांनी अजाप उक्तायलें.

नव्यान वेंचून आयिल्ल्या खासदारांक सोमारा लोकसभेंत सोपूत दिलो. केंद्रीय मंत्री पद परतून मेळिल्ल्यान श्रीपाद नायक राजभास कोंकणींतल्यान सोपूत घेतले, अशें सगळ्यांत दिसताले. पूण श्रीपाद नायक हांणी सगळ्यांचोच अदमास चुकयलो आनी थेट संस्कृत भाशेंतल्यान सोपूत घेतलो. खासदार कॅ. विरियातो फर्नांडीस हांणी मात राजभास कोंकणी भाशेंतल्यान सोपूत घेतलो. राज्यसभेच्या खासदार पदार नेमणूक जाले उपरांत सदानंद शेट तानावडे हांणी मराठींतल्यान सोपूत घेतिल्लो. ताका लागून गोंयच्या तिनूय खासदारांनी संसदेंत तीन वेगवेगळ्या भाशांक पसंती दिल्ल्याचें दिसलें. मजगतीं, हालींच जाल्ले लोकसभा वेंचणुकेंत उत्तर गोंयांत श्रीपाद नायक हांणी काँग्रेसीचे अ‍ॅड. रमाकांत खलप हांकां 1,16,015 मतांनी हारोवन जैताची डबल हॅट्ट्रीक केल्या. जाल्यार दक्षीण गोंयांत कॅ. विरियातो फर्नांडीस हांणी भाजपाची पल्लवी धेंपो हांकां 13,535 मतांनी हारयली. व्हड जैता उपरांत भाजपान श्रीपाद नायक हांकां केंद्रीय मंत्रीमंडळांत सुवात मेळ्ळ्या आनी तांचे कडेन राज्यमंत्रीपदाची जापसालदारकी दिल्या.