भांगरभूंय | प्रतिनिधी
बेंगळुरूं, खबरां संस्था ः इश्टांनी फकांडां करप, प्रँक करप, अश्यो गजाली सगळे कडेन घडत आसात. पूण फकांडां करपाचीय एक मर्यादा आसता. ती मर्यादा हुपल्यार फकांडां करप म्हागांत पडूंक शकता. अशीच एक धक्को दिवपी आनी विचित्र घडणूक बेंगळुरूंत घडली.
24 वर्सां पिरायेच्या तरणाट्याच्या गुदव्दारात ताच्या इश्टान कंप्रेसर वापरून हवा भरली. उपरांत कांय वेळान त्या तरणाट्याक मरण आयलें.
ह्या प्रकरणांत पुलिसांनी मुरली (23) नांवाच्या भुरग्याक अटक केली. तो कार सेवा केंद्रांत काम करता. ताचे आड खूनाचो गुन्यांव नोंद केला.
मरण आयिल्लो योगेश आर. हो तरणाटो आपली मोटारसायकल घेवन मुरली काम करता त्या कार सर्विस सेंटरांत गेलो. ताणें मुरलीक मोटारसायकल दुरुस्त करून ती धुंवपाक सांगली. मुरलीन मोटारसायकलाचे काम करुन ती धुंवली. मागीर तो मोटारसायकल सुकोवपा खातीर एअर कंप्रेसरान हवा मारतालो. मजे खातीर मुरलीन योगेशाच्या तोंडार कंप्रेसरान हवा मारली. ताचे पसून सुटका मेळोवपा खातीर योगशान आपलें तोंड ताचे पसून पयस करून वांकून उबो रावलो. हाचे उपरांत मुरली योगेशाच्या फाटीच्या पृश्ठ भागाचेर हवा मारपाक लागलो.
कंप्रेसरचो पायप कांय अंतराचेर आसलो तरी पूण हवेची गती इतली नेटान आसली की योगेशाच्या गुदद्वारात हवा गेली. तेन्ना योगेश जमनीर कोसळ्ळो आनी बेशुध्द पडलो. ताका उपचारा खातीर हॉस्पिटलांत दाखल केलो. योगेशाचेर उपचार करपी दोतोरांनी सांगलें, हवेचो वेग इतलो नेटान आसलो की ताच्या आंतकड्यांनी हवा भरली. ताचेर शस्त्रक्रिया केल्यो, पूण ताचेर उपचाराचो कांयच परिणाम जालो ना देखून ताका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
