भांगरभूंय | प्रतिनिधी
न्यूयाॅर्क, खबरां संस्था: भारतांत डिजिटल वेव्हार गांवगिर्या वाठारांनीय पावला. सरकारी अनुदान, वेगवेगळ्यो सरकारी सुविधांचो फायदो सरळ लाबार्थ्यांच्या बँक खात्यांत मेळप शक्य जालां. जनधन येवजणेक लागून कोट्यांनी लोकांची बँक खातीं उगडल्यांत. भारतांत जाल्ले हे डिजिटल क्रांतीची तोखणाय संयुक्त राष्ट्रांचे म्हासभेंत जाली. फाटल्या पांच ते स वर्सांत भारतांत ८० कोटी लोकांक स्मार्टफोनांच्या आदारान गरिबींतल्यान भायर काडल्यात अशें संयुक्त राष्ट्रांचे महासभेचे अध्यक्ष डेनिस फ्रान्सीस हांणी सांगलें. ‘सद्याच्या आनी फुडल्या पिळग्यां खातीर उपासमारी सोंपोवपाचे दिकेन उदरगतीक गती दिवप’ ह्या विशयाचेर उलयतना फ्रान्सीस हांणी डिजिटलान गांवगिर्या भारताची कशी उदरगत केल्या हाची एक देख दिली.
तांणी स्मार्टफोन वापरपा पयलींची परिस्थिती आनी आतां आशिल्ली परिस्थिती हांचे मदलो तुलनात्मक बदल स्पश्ट केलो. आयज गांवगिर्या वाठारांतले लोक लेगीत डिजिटल बँकींग फारीकणी पद्दत वापरून खूब सोंपेंपणान वेव्हार करपाक शकतात. स्मार्टफोनाक लागून तें खूब सोंपें जालां अशें तांणी सांगलें.
भारतांत आतां इंटरनॅटाचो व्हड प्रमाणांत वापर जाता अशें सांगून स्मार्टफोनान बँकींग वेव्हार कसो सोंपो जाला हाचीय देख तांणी दिली. भारताचे तुळेंत संवसारांतल्या हेर दक्षीण देशांनी (ग्लोबल सावथ) हे नदरेन भारता इतले यत्न करूंक ना. भारत देश मात डिजिटलायझेशनांत मुखार पावलो.
‘भारताच्या गांवगिर्या वाठारांतले लोक बँकींग वेवस्थे कडेन हाचे पयलीं जोडूंक नाशिल्ले. मात आयज ते स्मार्टफोना वरवीं आपलो वेवसाय करतात. बिलां फारीक करतात आनी स्मार्टफोना वरवींच फारीकणी स्विकारतात. भारतांत इंटरनॅटाचो वापर सकारात्मक वापर जावपाक लागला’’, अशें फ्रान्सीस हांणी सांगलें.
प्रधानमंत्री नरेंद्र मोदी हांच्या फुडारपणा खाला फाटलीं धा वर्सां डिजिटलीकरणाचेर चड लक्ष दिलां. २०१६ वर्सा ५०० आनी १००० रुपयांच्या नोटी चलनांतल्यान काडटकच डिजिटल वेव्हाराक व्हडली गती मेळ्ळी. हातूंत यूपीआय वेव्हाराचो व्हड वांटो आसा अशेंय तांणी सांगलें.
डिजिटलीकरणाक गती दिवपा खातीर प्रधानमंत्री नरेंद्र मोदी हांणी JAM ‘जन धन, आधार आनी मोबायल’ येवजण सुरू केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
