भांगरभूंय | प्रतिनिधी
सभापती ओम बिर्ला हांचें गोंय विद्यापीठांत आवाहन
पणजी : वेंचणुकेंत मत मारप हो दर एकल्याचो संविधानीक अधिकार आसा. देशाचे उदरगती सयत लोकशाय घटमुट करपा खातीर तरणाट्यांनी फकत मत मारून ओगी रावप चलचें ना, तांणी सक्रीय सहभाग घेवपाची गरज आसा. विकसीत भारत २०४७चें उद्दीश्ट साध्य करपा खातीर बायलां भशेन तरणाट्यांचें लेगीत संविधानीक संस्थांमदीं व्हडा प्रमाणांत वाटेकार जावप गरजेचें आसा, अशें लोकसभेचे सभापती ओम बिर्ला हांणी सांगलें.
गोंय विद्यापिठांत तांणी विद्यार्थ्यां कडेन संवाद सादलो. सभापती गणेश गांवकार, कुलगुरू प्रा. हरिलाल मेनन आनी हेर मानेस्त ह्या वेळार हाजीर आशिल्ले.
गोंय हो देशांतलोच न्हय जाल्यार संवसारांतलो एक सोबीत वाठार आसा. गोंयांत येतकीर शीकपाची, विचार करपाची, कार्य करपाची वेगळीच उर्बा मेळटा. गोंयांत रावून गोंय विद्यापीठ तशेंच गोंयच्या शिक्षण संस्थांनी शिकपाची संद मेळप हे हांगच्या तरणाट्यांचे भाग्य आसा. देशांत संसदीय लोकशाय आसा. लोकशायेच्या हेर पद्दती परस संसदीय प्रणाली ही सर्वोत्कृश्ट प्रणाली आसा. विकसीत भारताचें उद्दीश्ट साध्य करपा खातीर बायलां सयत तरणाट्यांच्या लेगीत योगदानाची गरज आसा. विधानसभा, संसद तशेंच हेर घटनात्मक संस्थांमदीं तरणाट्यांनी वाटो घेवपाक जाय. विचार करपी, उच्च शिक्षीत आनी चारीत्र्यवान लोकांचो सक्रीय सहभाग दिसानदिस वाडपाक जाय, अशें सभापती ओम बिर्ला हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
