भांगरभूंय | प्रतिनिधी
इंडीयन प्रिमीयर लिगेची (आयपीएल) 68वी मॅच येजमान रॉयल चॅलेंजर्स बंगळुरू आनी चेन्नय सुपरकिंग्स ह्या पंगडां मदीं हांगाच्या एम चिन्नास्वामी मैदानाचेर जातली.
आयची मॅच सामकी उमळशीक वाडोवपी जावपाची शक्यताय आसा. प्ले ऑफाची चवथी आनी निमाणी सुवात मेळोवपाक दोनूय पंगडां मदीं चुरस आसा. दोनूय पंगड एकामेका आड 32 मॅची खेळ्ळ्यात. हातूंतल्यो 10 मॅची बंगळुरून आनी 21 मॅची चेन्नय सुपरकिंग्सान जिखल्यात. एके मॅचीचो निकाल लागूंक ना. चिन्नास्वामी मैदानाचेर ह्या पंगडां मदीं 10 मॅची जाल्यात. हातूंतल्यो 5 मॅची चेन्नय पंगडान जाल्यार 4 मॅची बंगळुरू पंगडान जिखल्यात. अंदूंच्या हंगामांतल्या पयल्या टप्प्यांत ह्या पंगडां मदीं जाल्ली मॅच चेन्नय सुपरकिंग्सान 6 विकेटींनी जिखिल्ली.
एम चिन्नास्वामीच्या मैदानांत स्पिनरांक बरोच मार पडटा. पूण, रॉयल चॅलेंजर्स बंगळुरू आड आपल्या उत्कृश्ट टी-20 रॅकॉर्डाच्या नेटार रवींद्र जडेजा आपलो ठसो उमठोवपाक शकता. ताणें ग्लॅन मॅक्सवॅलाक सात खेपे, विराट कोहली आनी दिनेश कार्तिकाक तीन-तीन खेपे बाद केला. क्रिस ग्रीनाक एकदा बाद केला. बंगळुरूचो मुखेली फाफ ड्युप्लेसीसाक बाद करपाक जरी जडेजाक जमूंक नासलें तरी ताणें फकत 119चे स्ट्रायक रेटीन धांवड्यो दिल्यात.
13 डावांनी सगल्यांत चड 661 धांवड्यो करून कोहलीन ऑरेज कॅप आपल्या कडेन दवरलें आसलें तरी ताचे स्ट्रायक रेटीचेर सध्या बरीच चर्चा चालू आसा. अंदूंच्या हंगामाच्या पयल्या स मॅचींनी व्हड स्कोर उबारून लेगीत कोहलीन फकत 131चे स्ट्रायक रेटीन धांवड्यो केल्यात. पूण, फाटल्या सात डावांनी ताणें 193चे स्ट्रायक रेटीन धांवड्यो केल्यात. अंदूं कोहलीन पावर प्लेंत 163चे स्ट्रायक रेटीन धांवड्यो केल्यात. ताच्या खंयच्याय हंगामा परस सर्वोत्कृश्ट आसा. आयचे मॅचींत लेगीत तो व्हड स्कोर उबारपाक शकता. हाचें फाटलें मुखेल कारण म्हणल्यार जडेजाक सोडलो जाल्यार चेन्नयच्या सगल्या बॉलरां आड तो सहज रितीन खेळटा. शार्दुल ठाकूरा आड ताची स्ट्रायक रेट 160ची आसा.
फाटल्या हंगामांत धांवड्यांचो पावस घालपी अजिंक्य रहाणेन अंदूं मात निर्शेणी हाडली. 11 डावांनी खेळून लेगीत ताका अर्द शेंकडो मारपाक जमूंक ना. ताणें 120 स्ट्रायक रेटीन फकत 209 धांवड्यो केल्यात. कर्ण शर्मान ताका तीन खेपे बाद केला. जाल्यार रहाणेन ताच्या आड फकत 114.28चे स्ट्रायक रेटीन धांवड्यो केल्यात.
अंदूं 583 धांवड्यो करपी चेन्नयचो मुखेली ऋतुराज गायकवाडाक आनीक व्हड खेळी करपाची संद आसा. क्रीस ग्रीन आनी स्वप्नील सिंग हांकां सोडले जाल्यार गायकवाडान बंगळुरूच्या सगल्या बॉलरां आड 132 परस चड स्ट्रायक रेटीन धांवड्यो केल्यात. मॅक्सवॅला आड ताची स्ट्रायक रेट 390 इतकी आसा. ल्यॉकी फर्ग्युसन, यश दयाल आनी मोहम्मद सिराज हांच्या आड वळेरेन 193, 142 आनी 132चे स्ट्रायक रेटीन धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
