भांगरभूंय | प्रतिनिधी
जमीन खंय सगलें पोटांत घेता आनी दर्या पोटांतलें भायर उडयता. जमीन, दर्या, न्हंयो, व्हाळ सगलें आमकां गरजेचे. ताचे बगर आमी जियेवंक शकनात. ते आमकां जितलें दितात, तितलें कोणूच दिनात. आमचे मदल्या भोवतेक लोकांक धर्तरेचे हे दोन घटक पोसतात. मात आमी पडमूर. तांची जतनाय तर आमी घेनात, उरफाटें ते दुशीत करतात…. आनी हालींच्या कांय वर्सांनी हें काम आमी निर्माण केल्लें आनी जळामळां उडयिल्लें प्लास्टीक करता. जमीन आनी दर्या ह्या प्लास्टिकान बुरसो करून उडयला. ताचे परिणाम आमकांच भोगचे पडटात. दिल्ल्या मापान घेवप म्हणटात तें हेंच. साळगांवां गोंय राज्य प्रदुशण नियंत्रण मंडळाच्या ऑनलायन पर्यावरण डेटा मॉनिटरींग रूम आनी तंत्रज्ञान म्हायती केंद्राचें उक्तावण जालें. त्या वेळार सगल्याच मानेस्तांनी प्लास्टिका विशीं हुस्को उक्तायलो. मिरामारा प्लास्टिका विशींचें प्रदर्शन भरलां. तातूंत भायर उडयिल्ल्या प्लास्टिका पसून आमी टिकावू वस्तू कश्यो तयार करूंक शकतात, ताची म्हायती दिवपी स्टाॅल आसात. लाखांनी लोकांक रोजगार मेळूंक शकता, असो हो उद्देग. मात, पयशे मेळटात म्हूण आमी प्लास्टिकाच्या राकेसाक वाडपाक दिवंक जायना. कारण तो पर्यावरणाचेर थेट परिणाम करता.
गोंयांत फाटल्या 20 वर्सां सावन प्लास्टीक कोयर वाडत आसा. प्लास्टीक एकठांय करप हो बरी जोड दिवपी उद्देग थारला अशें म्हणल्यार अतिताय थारची ना. गोंय सरकार आनी कांय संस्थांनी एकठांय येवन दिवचल आनी सत्तरी म्हालांतल्या तीन नगरपालिका आनी 30 पंचायतींच्या वाठारांतलो सगलो कोयर एकठांय करपाचें आनी सुको, ओलो कोयर वेगळो करपाची मोंख दवरल्या. दरेके पंचायतीन कोयर वेगळो करपाची आनी ताचो विलो लावपाची यंत्रणा उबारली जाल्यार प्लास्टीक आनी हेर कोयराची समस्या सुटावी जातली.
एक नदर मारल्यार सरभोंवतणी प्लास्टीक दिसतलेंच. उदकाच्यो बाटल्यो, कपां, जार, पाकिटां, पोतयो…. !! आमच्या जिविता सयत सगले कडेन प्लास्टीक घुसलां. तें मागीर जमनींत मुंगरून नाच्च जाता. वाऱ्या वांगडा उडून वता, उदका स्रोतांनी पडटा, शिरकता. जनावरां, सुकणीं, नुस्तीं ते खाता. प्लास्टिकान आमच्या सुकणीं आनी प्राण्यांच्या जगाची वाट लायल्या तितली कांसादोरांनी पसून लावंक ना आसतली. प्रत्येकान प्लास्टिका पसून चार हात पयस रावपाचो निश्चेव केल्यार प्लास्टिकाचें प्रदुशण अर्दें तरी ना जातलें. बाजारांत सामान हाडपाक आमी प्लास्टीक पोती वापरतात, दुकानदार जें कितें दिता ते प्लास्टीक पोतयेंत घालूनच! आमी स्वताची पोती केन्ना वापरूंक सुरवात करतले? दर्या, न्हंयांनी वचपी प्लास्टिकाक लागून वर्साक उणेंच 1 लाख उदकांतले जीव (नुस्तें, कांसव) मरतात. ताका लागून आतां एक फावट वापरपाची प्लास्टिकाची उदका बाटली घेवची न्हय, अशी एक चळवळ संवसारांत सुरू जाल्या. प्लास्टिकाचो एकेक कण रि- सायकल जाल्यार प्रदुशण उणें जातलें. गोंय सरकार ताचोय विचार करता.
जेवण भायल्यान आॅर्डर करचे परस तें प्रत्यक्ष थंय वचून खावपाक जाय, नाजाल्यार थळावें अन्न वा घरांत केल्लें तरी. कारण जेवण आनी खाणां संवसारभर प्लास्टिकान गुठलावन मेळटात. खातना, पियेतना मुखार प्लास्टीक येवचें ना हाची जतनाय घेवंक जाय. ताजीं फळां, कड्डणां शेतां, पोरसांतल्यान विकत घेवप जांकां शक्य आसा, तांणी तीं घेवपाक जाय. उपरांत तीं प्लास्टिकाच्या पोतयांनी रेवडावन माॅलांनी वतात. आतां दुदा सावन कड्डणां मेरेन सगलेंच प्लास्टिकाचे भकीक पडलां. खास करून शारांनी. बाजारांतल्या म्हाला कडेन संबंदीत प्लास्टिका आड सरकारान कितें तरी उपाय काडप गरजेचें.
प्रत्येक कोयर विलो प्रकल्पांत प्लास्टीक नश्ट करपाची वेगळी सुविधा आसूंक जाय. तिवूय बी प्रदुशण नाशिल्ली. 1975 मेरेन प्लास्टिकाचो वापर उणो जातालो. मागीर 1990 च्या दसकांत तो वाडलो. एकल्यान केलें, म्हणटकूच दुसरो करपाक लागलो. ह्या अनुकरणांतल्यान 2000 साला उपरांत प्लास्टिकाच्या राकेसान भिरांकूळ रुप घेतलें. तें अजून ना जावंकना. आमच्या देशांत दरवर्सा उणेंच 40 कोटी टन प्लास्टीक तयार जाता. फुडल्या 25 वर्सा भितर तें वाडून 110 कोटींचे पावपाचें आसा खंय. 40 टक्के प्लास्टिक फक्त खावपाच्या जिनसां कडेन संबंदीत आसा… आनी उत्पादनाच्या एकूण 80 टक्के मातयेंत, उदकांत मिस्तुराद जाता. हाचे वयल्यान प्रदुशणाचो अदमास येतलो. शास्त्रज्ञांनी प्लास्टीक खावपी बॅक्टेरिया तयार केल्ल्यो, ताचें कितें जालें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
