भांगरभूंय | प्रतिनिधी
कोयर नियंत्रण कायद्या खाला नवी येवजण
भांगरभूंय । प्रतिनिधी
पणजी : प्लास्टिकाच्यो बाटल्यो तशेंच पॅकींगचे सामान परतून दिवन ठेवीची रक्कम (डिपॉझीट) उत्पादक वा विक्रेत्याक परतून दिवपी येवजण अधिसुचीत जाल्या. कोयर नियंत्रण कायद्याखाला ही येवजण सरकारान तयार केल्या. प्लास्टिकाच्यो बाटल्यो घेवन ठेवीची रक्कम परतून दिवपा खातीर एजन्सीची नेमणूक जातली. प्लास्टिकच्यो बाटल्यो तशेंच प्लास्टीक पॅकिंगांचेर नियंत्रण दवरपा खातीर ही येवजण तयार केल्या.
येवजणेचे कार्यवाही खातीर प्रशासकाची नेमणूक जातली. प्रशासक फावो त्या प्रमाणांत एजन्सींची नेमणूक जातली. पणजी म्हापालिका, हेर नगरपालिका तशेंच दरेके पंचायतीत प्लास्टिकाच्यो बाटल्यो घेवपा खातीर खासा केंद्रां (कलेक्शन सेंटर) स्थापन जातलीं. पणजी सारक्या शारांत एका परस चड केंद्रां आसप शक्य आसा. प्लास्टिकाच्यो बाटल्यो वा प्लास्टिकाचें पॅकिंगाचें सामान स्थापन केल्या केंद्रांनी दिल्या उपरांत ठेवीची रक्कम (डिपॉझीट) परतून मेळटली. एजन्सी वरवीं हीं केंद्रां चलतलीं. हाका लागून गिरायकाक प्लास्टिकाच्या बाटल्यां खातीर चड पयशें फारीक करचे पडटले. उत्पादक वा वितरकाक एजन्सी कडेन ठेव रक्कम (डिपॉझीट) जमा करची पडटली. हे रकमेचो उत्पादनाच्या दराचेर (एमआरपी) कसलोच परिणाम जावचो ना. विक्रेते वा दुकानदार दुकानाचेर तकटो लावन वा तोंडान गिरायकांक हाची म्हायती दितले. येवजणे विशीं जागृताय करपाची जापसालदारी दुकानदार वा विक्रेत्यांची आसा.
हे येवजणे खातीर ऑपरेटराची नेमणूक जातली. येवजणेची पद्दत तशेंच कार्यवाही हो ऑपरेटर थारायतलो. प्रशासक तशेंच एजन्सींची नेमणूक करून ठेव रक्कमच्या (डिपॉझीट) आदारान तो येवजण चालीक लायतलो. नगरपालिका, पंचायतींनी जागृताय करपाक जाय. गिरायकां कडल्यान जी रक्कम घेतात ती बाटली परतून दिले उपरांत गिरायका मेरेन पावतली, हाची जापसालदारी ऑपरेटर वा एजन्सीची आसा. उत्पादक वा वितरकांनी येवजणे खातीर वर्सुकी शुल्क दिवचें पडटलें. हाका लागून ऑपरेटर वा एजन्सींक तंत्रज्ञानाच्या वापरान पद्दत तयार करची पडटली. पालिका, पंचायतींनी बाटल्यो घेवपा खातीर केंद्रां (कलेक्शन सेंटर) स्थापन जावपा सयत ऑपरेटर, प्रशासकाच्या नेमणुके उपरांत येवजणेची कार्यवाही सुरू जातली. ठेवीची रक्कम भरपा सयत परत मेळपा खातीर बँकांनी खातीं उक्तीं करचीं पडटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
