भांगरभूंय | प्रतिनिधी
संवसारभरांतल्या लोकांनी ह्या दिसा पर्यावरण वाचवपाचो आनी मनशाचो फुडार सुरक्षीत दवरपाचो संकल्प केलो आनी प्लास्टीक मुक्त जावपाचें उतर घेतल्यार हो दीस अर्थपूर्ण थारतलो.
आयज 5 जून. हो दीस संवसारभर पर्यावरण दीस म्हूण मनयतात. फाटल्या अडेज शेंकड्यांत खास करून उद्देगीक क्रांती उपरांत संवसारीक हवामानांतल्या बदलाचो आनी हेर हानीकारक बदलांचो विचार करून धर्तरेचें आयुश्य सहज, सभावीक आनी सैमाच्या नेमा प्रमाण आसचें हे खातीर 5 ते 15 जून 1972 मेरेन संयुक्त राश्ट्रांत (UNO) परिशद जाली. हातूंत संयुक्त राश्ट्रांच्या सार्वत्रिक सभेंत संयुक्त राश्ट्रांच्या पर्यावरण कार्यावळी विशीं खोलायेन भासाभास केली. तातूंत मनशाच्या हस्तक्षेपाक लागून पर्यावरणाक जावपी नुकसान आनी ताचो मनशाच्या जिविताचेर जावपी वायट परिणाम हांचेर खोलायेन चर्चा जाली. उपरांत कांय गंभीर पावलां उबारचीं अशें थारलें. हे परिशदेंत संयुक्त राश्ट्रांच्या पर्यावरण कार्यावळीचो (युएनईपी) जल्म जालो आनी दर वर्सा 5 जून हो संवसारीक पर्यावरण दीस म्हूण मनोवपाचेंय थारायलें, जाका लागून लोक, सरकार आनी समाज हांचे मदीं पर्यावरणा विशीं लोकांक जागृताय निर्माण जावंक शकतली.
हे परिशदेंत भारताची तेन्नाची प्रधानमंत्री इंदिरा गांधीन पर्यावरणाची इबाडत वचपी जागतीक परिस्थिती आनी ताचो संवसाराच्या फुडाराचेर जावपी परिणाम हांचेर प्रभावी भाशण केलें आनी संतुलीत वातावरणाचें म्हत्व सांगलें. आंतरराश्ट्रीय पर्यावरणीय पांवड्यार भारत सरकाराचें हें पयलें म्हत्वाचें पावल आशिल्लें. फुडल्या वर्सा म्हणल्यार, 1973 ते धर्तरी हो विशय घेवन ल्हान संकल्पनेन हो दीस मनयलो. 1974 वर्सा संवसारांतल्या वेगवेगळ्या शारांनी हो दीस व्हड उमेदीन मनोवपांत लागलो आनी तेन्ना सावन 5 जून हो दीस संवसारभर पुराय भक्तीभावान संवसारीक पर्यावरण दीस म्हणून मनयतात. सुमार 150 देशांनी हो दीस मनयतात आनी दरवर्सा वेगळो देश संवसारीक पांवड्यार ही कार्यावळ घडोवन हाडटा.
संवसारीक परिस्थिती, अन्न, उदक, दुकळ, तापमान वाड, हवामान बदल आनी ताचे प्रतिकूल परिणाम, मनशाचें जिवीत आनी फुडार हांचे विशीं जागृताय करपा खातीर हो दीस मनयतात. ते खातीर दर वर्सा एक नवो विशय वेंचून काडटात आनी ताचेर काम करतात. हे खातीर वेगवेगळ्या देशांनी पर्यावरणाक संबंदीत आशिल्लीं जनावरां, सुकणीं आनी रानां सांबाळपाखातीर वेगवेगळे कायदे केल्यात. 2020 वर्सा कोलंबियान हो दीस आयोजीत केल्लो. 2021 वर्सा पाकिस्तानान ही जिवीत बदलपी कार्यावळ घडोवन हाडली. 2022 वर्सा स्विडन ह्या दिसाचो येजमान आशिल्लो. फकत आनी फकत धर्तरी हो त्या वर्साचो विशय आशिल्लो. 2023 वर्सा आयव्हरी कोस्ट ह्या दिसाचो येजमान आशिल्लो. त्या वर्साचो विशय आशिल्लो प्लास्टीक प्रदुशणाचेर उपाय. त्या दिसा वेगवेगळ्या देशांतल्या भितरल्या परिस्थितीचो पर्यावरणाचेर कितलो वायट परिणाम जाता हाचे विशीं जागृताय जाली.
2020 आनी 2021 वर्सा कोरोना महामारीच्या संवसारीक संकश्टाक लागून ही कार्यावळ भौशीकपणान मनोवचे बदला ऑनलायन मनयली. फाटल्या वर्सा म्हणल्यार 2024 वर्सा ‘आमची जमीन आमचो फुडार : जमनीची पुनर्स्थापना, वाळवंटीपण आडावप आनी दुकळ लवचीकपण’ ह्या विशयांतल्यान ती मनयली. जमीन परतून मेळोवप, जमीन रेंवट जावपा पसून आडावप आनी दुकळाच्या परिणामांक तोंड दिवपाक मेळप हो ह्या विशयाचो हेत आशिल्लो. फाटल्या वर्सा सावदी अरेबिया संवसारीक पर्यावरण दिसाचो आयोजीत आशिल्लो. अंदूं म्हणल्यार 2025 वर्सा दक्षीण कोरिया संवसारीक पर्यावरण दिसाची येजमान आसा आनी ह्या वर्साचो विशय ‘प्लास्टीक प्रदुशण थांबवचें.’ प्लास्टीक प्रदुशण थांबोवपा खातीर संवसारीक पांवड्यार एकठांय येवन वावुरप हो ह्या विशयाचो संदेश.
युएनईपीच्या म्हणण्या प्रमाण प्लास्टीक प्रदुशण एक गंभीर समस्या जाल्या, जी पर्यावरण आनी मनशाचे भलायके खातीर धोक्याची आसा. ह्या समयार, प्लास्टीक प्रदुशणा विशीं आनी ताचे वायट परिणामा विशीं जागृताय करपा खातीर संवसारभर वेगवेगळे कार्यावळी घडोवन हाडटले. संवसारभरांतल्या लोकांनी ह्या दिसा पर्यावरण वाचवपाचो आनी मनशाचो फुडार सुरक्षीत दवरपाचो संकल्प केलो आनी प्लास्टीक मुक्त जावपाचें उतर घेतल्यार हो दीस अर्थपूर्ण थारतलो. संवसारीक पर्यावरण दिसा सगळ्यांक परबीं!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
