भांगरभूंय | प्रतिनिधी
नवी दिल्ली, खबरां संस्था ः आमी चड करून प्लास्टीक बदला पर्याय म्हणून कंवचेच्यो बाटल्यो वापरतात. पर्यावरण आनी भलायके खातीर त्यो बऱ्यो आसात अशें मानतात. पूण फ्रांसाच्या नव्या अभ्यासाक लागून हो समज चुकीचो थारता. अभ्यासांत म्हणलां, कंवचेच्या बाटल्यांक लागून आमच्या पेयां मदीं व्हड प्रमाणांत मायक्रोप्लास्टीक मिक्स जावंक शकता. घडये प्लास्टीक बाटल्यां परसय चड!
अभ्यासांत कितें मेळ्ळें?
फ्रेंच अन्न सुरक्षा एजन्सी (ANSES) हे संस्थेन केल्ल्या ह्या अभ्यासांत शास्त्रज्ञांनी एक धक्को दिवपी निश्कर्श काडलो. तांकां थंड पेयां, लिंबू सरबत, बियर ह्या पेयांच्या कंवचेच्या बाटल्यांनी दर लिटराक सरासरी 100 मायक्रोप्लास्टीक कण मेळ्ळे. प्लास्टीकच्या बाटल्यांनी वा धातूच्या डब्यांनी मेळपी कणां परस हो आंकडो सुमार 50 पटींनी चड आशिल्लो!
शास्त्रज्ञांच्या मतान ह्या प्रदुशणाचें मुखेल कारण बाटलेचें धातूचें झाकण आसूं येता. बाटली उगडटना वा बंद करतना झाकणाचेर रंगाचे खूब बारीक कण पेयांत मिक्स जावपाची शक्यताय आसता. खास करून बियरीच्या बाटल्यांनी हें प्रमाण चड आशिल्ल्याचें दिसून आयलें. हाचे उरफाटें उदकांत आनी सोडांत मायक्रोप्लास्टिकचं प्रमाण खूब उणे आसा. विशेश गजाल म्हळ्यार कॉर्क स्टॉपर आशिल्ल्या वायनाच्या बाटल्यांनी उण्या प्रमाणांत दूशितताय मेळ्ळी.
हाचेर उपाय
हें प्रदुशण कित्याक जाता हें अजून पुरायपणान स्पश्ट जावंक नासलें तरी संशोधकांनी ताचेर उपाय सुचयला. बाटलेचीं झाकणां बरी धुवन इथेनॉल-उदकाच्या मिश्रणान निवळ केल्यार पेयांत मिक्स जावपी मायक्रोप्लास्टीक कणांचो आंकडो खूब उणो जावंक शकता.
मायक्रोप्लास्टीकाचो धोको
मायक्रोप्लास्टीक म्हळ्यार 5 मिलिमीटरा परस ल्हान प्लास्टीक कण. हे कण आतां पर्यावरणांत व्हड प्रमाणांत पातळ्ळ्यात. दर्याच्या तळासावन ते उंचेल्या दोंगरां मेरेन. आमच्या अन्नांनी आनी पिवपाच्या उदकांतय ते पातळ्ळ्यात. मनशाचे भलायकेचेर ताचो परिणाम कितें जाता हाचेर अजूनय संशोधन चालू आसा. पूण ही चिंतेची गजाल आसा. 1950 च्या दशका सावन प्लास्टीक उत्पादनांत खूब वाड जाल्या आनी तांच्या वायट वेवस्थापनाक लागून ही समस्या चड गंभीर जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
