प्लास्टीक दियात, भांगर व्हरात….
भांगरभूंय | प्रतिनिधी
भांगरभूंय । खबरां संस्था
जम्मू : प्लास्टीक हो भारतांतूच न्हय तर पुराय संवसारा खातीर चिंता करपा सारको विशय. प्लास्टिकाचो वायट परिणाम जीवसृश्टीचेरूय जाता. ताका लागून प्लास्टीक मुक्त जावपाक सगळीं शारां, देश, तशेंच संस्था, संघटणा आपापले तरेन यत्न करतात. हातूंतलोच जम्मू- काश्मीराच्या अनंतनाग जिल्ह्यांतलो सादिवरा हो गांव. तो सध्या प्लास्टीक मुक्त जाला.
हांगा 20 क्विंटल प्लास्टीक दिल्यार एक भांगराचें नाणें मेळटा. हय तुमी सारकें आयकलें, गांवचे सरपंच अॅड. फारुख अहमद गनई हांकां गांव प्लास्टीक मुक्त करपाचो आशिल्लो. ते खातीर तांणी खूब यत्न केले. पूण येस मेळ्ळें ना. उपरांत तांणी एक घोशणा केली. परिणाम अजाप करपा सारको आशिल्लो. तांचे एके घोशणेन पुराय गांव कोयर मुक्त जालो.
अॅड. गनई हांणी ‘प्लास्टीक दियात आनी भांगर व्हरात‘ ही मोहीम सुरू केली. जो कोण 20 क्विंटल प्लास्टीक दितलो ताका पंचायत भांगराचें नाणें दितली, अशी घोशणा तांणी केली. मागीर सगलेच धांवले, प्लास्टिक सोदपाक. फक्त 15 दिसां भितर पुराय गांव प्लास्टीक मुक्त जालो. हें पळोवन लागींच्या सगळ्या पंचायतींनी कळाव करिनासतना हे मोहिमेचो आदार घेतला.
सरपंच अॅड. गनई हांणी सांगलें- गांवांत आपणें प्लास्टीकच्या बदलाक भांगर दिवपाची घोशणा केली आनी ती येसस्वी जाली. न्हंयो-व्हाळ नितळ करपा खातीर आपणें फुडाकार घेतिल्लो. हे मोहिमेक बरे येस मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
