भांगरभूंय | प्रतिनिधी
म्हापशें : राज्यात बंदी आशिल्ल्यो प्लास्टर ऑफ पॅरिस (पीओपी) गणेश मुर्ती विक्रे खातीर दवरिल्ल्याच्या आरोपा खाला कोलवाळ पुलिसांनी शिरसयच्या एका गणपती चित्रशाळेच्या धनया आड गुन्यांव नोंद केला. ही कारवाय बार्देशच्या उपजिल्लोधिकारी वर्षा परब हांचे कागाळी उपरांत केली.
हे विशीं मेळिल्ले चड म्हायती प्रमाण, ८ ऑगस्टाक उपजिल्लोधिकारी कार्यालयान गोवा राज्य प्रदूशण नियंत्रण मंडळाच्या सहकार्यान शिरसयचे एके चित्रशाळेची तपासणी केल्ली. ह्या वेळार गणेश मुर्तीं मदीं वापरिल्ल्या सामानाचे नमुने घेतले. प्रदूशण नियंत्रण मंडळान तपाशिल्ल्या ह्या नमुन्यांनी पीओपीचो वापर जाल्ल्याचें स्पश्ट जालें. उपरांत २५ ऑगस्टाक उपजिल्लोधिकारी वर्षा परब हांणी कोलवाळ पुलिशेंत कागाळ दाखल केली. ते प्रमाण पुलिसांनी दुबाविता आड पीओपी मूर्ती विक्री बंदी अधिसुचोवणे खाला गुन्यांव नोंद केलो.
गुन्यांव नोंद जाले उपरांत पुलिसांनी त्याच दिसा चित्रशाळेचेर छापो घालो. मात, मजगतीं दुबावितान मुर्तींची पयलींच विक्री केल्ल्यान पुलिसांक खंयचीच मुर्ती जप्त करपाक मेळूंक ना. ह्या प्रकरणाचो फुडलो तपास पुलीस निरीक्षक संजीत कांदोळकार हांच्या मार्गदर्शना खाला सुरू आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
