भांगरभूंय | प्रतिनिधी
नवी दिल्ली, खबरां संस्था ः भारतांत प्रौढां मदीं ॲलर्जीची वाड शारांनीच तशींच गांवगिऱ्या वाठारांतल्या लोकां मदीं जायत आसा. इंडियन काउन्सिल ऑफ मेडिकल रिसर्च (ICMR), वर्ल्ड इन्स्टिट्यूट ऑफ ॲलर्जी आनी लॅन्सेटच्या हालींच्या अहवाला प्रमाण देशांतल्या 27 ते 35 टक्के प्रौढांक उण्यांत उणें एका प्रकारची एलर्जी आसा. फाटल्या दशकांत धुल्लाची ऍलर्जिक राइनायटिस, अन्न ॲलर्जी, वखदां ॲलर्जी आनी खास करून कातीची एलर्जी हांचे प्रमाण दुपेटीन वाडलां अशें तज्ञांचें मत आसा.
देशभरांतल्या 12 शारांनी आयसीएमआर-एसीसीएस हांणी केल्ल्या बहुकेंद्रीय सर्वेक्षणां प्रमाण, भारतांतल्या शारी प्रौढां मदीं ॲलर्जिक राइनायटिसाचें प्रमाण 20.5% आसा. तशेंच संवसारीक भलायकी संघटना-जीआयएनए डेटाबेस प्रमाण फाटल्या धा वर्सांत दम्याच्या दुयेंतींत 15% वाड जाल्या. तज्ञांच्या मतान, कोविडा उपरांतच्या काळांत प्रौढां मदीं अन्न ॲलर्जींत वाड जाल्या. एम्स-आयएलआय क्लिनिकाच्या डेटा प्रमाण प्रौढ दुयेंती मदीं अन्न ॲलर्जीचें प्रमाण 7 टक्क्यां वयल्यान 12 टक्क्यां मेरेन वाडलां.
अहवाला प्रमाण भारतांत प्रौढां मदीं ॲलर्जी संबंदीत सल्लागारांत 40 टक्क्यांनी वाड जाल्या. तज्ञांच्या मतान घरांतलें एअर कंडिशनिंग वाडप, हवामान उणें जावप, घरगुती धुल्लकण, पाळीव जनावरांचे केंस गळप, जंक फूड खावप वाडप तशेंच वाडपी प्रदुशण, आहारांतले बदल, रसायनांचो संपर्क, जिणे पद्दतींत बदल आनी हवामानांतले बदल प्रौढां मदीं ॲलर्जी वाडपाक कारण आसात. भारतांत फुडल्या दशकांत एलर्जी आशिल्ल्या प्रौढांचो आंकडो 40 टक्क्यां मेरेन पावूं येता असो अदमास वर्ल्ड ॲलर्जी असोसिएशनाच्या अहवालांत उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
