भांगरभूंय | प्रतिनिधी
10 दीस बशिल्ले उपोशणाक; भुतानी प्रकल्पा आड सांखळी उपोशण दवरतले सुरूच
वास्को: सांकवाळे फाटले धा दीस उपोशण करपी आदले सरपंच प्रेमानंद नायक हांणी दिवाळी मनोवंक मेळची हे खातीर दक्षीण गोंयचे खासदार कॅ. विरियातो फर्नांडीस हांणी केल्ले विनंतीक मान दिवन नायक हांणी फादर केनेथ तेलीस हांचे हस्तुकीं सरबत पियेवन काल (बुधवारा) सकाळीं उपोशण सोडलें. पूण भुतानी प्रकल्पाक विरोध कायम उरचो हे खातीर दिवाळेच्या काळांत थंय क्रिस्तांव भाव उपोशणाक बसतले.
प्रेमानंद नायक हांच्या उपोशणाक गोंयांतल्या विवीध वाठारांतल्यान व्हड प्रमाणांत तेंको मेळ्ळा. तांची देंवत चलिल्ली भलायकी आनी बिरेस्तारा सावन सुरू जावपी दिवाळी तांच्या कुटुंबाक मनोवंक मेळची हे खातीर खासदार फर्नांडीस हांणी मध्यान रातीं सदर सुवातेर भेट दिली. उपरांत परतून फांतोडेर ते थंय आयले. तांणी नायक हांची समजूत काडून तांणी उपोशण फाटीं घेवपाची विनंती केले उपरांत नायक हांणी उपोशण फाटीं घेवपाक सहमती दाखयली.
थंय जमिल्ले समाजीक कार्यकर्ते, रहिवाशी, विवीध पक्षांचे फुडारी हांणी सरकाराचे भुमिकेचेर टिका केली. काँग्रेसीचे आदले प्रदेशाध्यक्ष गिरीश चोडणकार हांणी कांय पंच आनी फुडाऱ्यांक भुतानी हांणी विकत घेतिल्ल्याचो दावो केलो. मुख्यमंत्र्यांनी लक्ष घालीत जाल्यार हो प्रकल्प सहजतायेन रद्द जावंक शकता अशें हाजीर आशिल्ल्यांक सांगलें.
रामराव वाघ हांणी हें लोकभावनेचें जैत आसून ती दिवाळेची भेट आशिल्ल्याचें सांगलें. रामा काणकोणकार हांणी लडपा खातीर एकवट कायम दवरात अशें आवाहन केलें.
तुळशीदास नायक हांणी प्रेमानंद नायक हांच्या उपोशणान सांकवाळकारां सयत गोंयच्या तशेंच सगल्या जातीधर्माक एकठांय हाडिल्ल्याचें सांगलें.
ह्या वेळार प्रतिमा कुतिन्हो हांणी त्या शौचालयांतल्या सीसीटीव्ही कॅमेरा प्रस्नाचेर गुन्यांव दाखल जाल्लो आसलो तरी दुबावितांक अजून अटक कित्याक जायना असो प्रस्न उपस्थीत केलो. ह्या वेळार शंकर पोळजी, ओलंसियो सिमोयश, मारियान, दामोदर नायक, नारायण डी. नायक, आमदार व्हेंझी व्हिएगश, समाजीक कार्यकर्त्यो तारा केरकार, फिडोल परेरा, पंच मौर्लियो कार्व्हालो आनी हेरांनी आपले विचार मांडले.
क्रिस्तांव भाव बसतले उपोशणाक
भुतानी प्रकल्पाक विरोध कायम उरचो हे खातीर दिवाळेच्या काळांत थंय क्रिस्तांव भाव सांखळी पद्दतीन उपोशणाक बसतले. सुकुर मिनिझीस (पणजी), गिलरॉय कॉस्ता (कांसावली), फिडोल परेरा हांणी सांखळी पद्दतीन उपोशणाक सुरवात केली. सकाळीं धा ते सांजवेळा स ह्या वेळांत उपोशण करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
