भांगरभूंय | प्रतिनिधी
पणजी : फोंडें म्हालांतल्या खंयच्याय मतदारसंघातल्यान वेंचून येवपाची तांक म्हजे मदीं आसा. येता ते वेंचणुकेंत प्रियोळाचेर म्हजो दावो आसतलो. प्रियोळ मतदारसंघा खातीर म्हजें सगल्यांत चड प्राधान्य आसतलें अशें मगोचे अध्यक्ष दीपक ढवळीकार हांणी सांगलें.
महाराष्ट्रवादी गोमंतक पक्ष आनी भाजप हांचें मदीं वैचारीक समानताय आसा. वैचारीक समानताय आशिल्ल्यान युती तिगून आसा. मगो आनी भाजप युती जाली जाल्यार 50 टक्के मतां युतीक मेळप शक्य आसा. हाका लागून मगो आनी भाजप युती जावपाची गरज आसा. भारतीय जनता पक्षा कडेन हे दिकेन चर्चा सुरू आसा. मगो आनी भाजप युती जाली जाल्यार येता ते वेंचणुकेंत 27 सुवातांचेर जैत मेळप शक्य आसा. मगो सयत आशिल्ल्या युतीचो लाव भाजपाक जाला, अशें तांणी सांगलें.
मगो आनी भाजप युती विशीं वेंचणूक लागीं पावतकूच चर्चा जातली. तरी मगो 8 जाग्यांचेर दावो करतली. प्रियोळ मतदारसंघाचेर म्हजो दावो आसतलो. प्रियोळ, शिरोडें वा फोंडें म्हालांतल्या खंयच्याय मतदारसंघातल्यान हांव वेंचून येतलों. फोंडें म्हालांत सगली कडेन म्हजे कार्यकर्ते आसात, अशें दीपक ढवळीकार हांणी सांगलें.
महाराष्ट्रवादी गोमंतक पक्ष हो पोरणो पक्ष. ह्या पक्षाक इतिहास आसा. हाका लागून हो पक्ष गोंयांत उरतलोच, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
