भांगरभूंय | प्रतिनिधी
प्रधानमंत्री नरेंद्र मोदी हांचो अपमान करपी वक्तव्य केल्ल्याच्या आरोप
नवी दिल्ली, खबरां संस्था ः प्रधानमंत्री नरेंद्र मोदी हांचो अपमान करपी वक्तव्य केल्ल्याच्या आरोपा वयल्यान वेंचणूक आयोगान काँग्रेस सरचिटणीस प्रियंका गांधी आनी दिल्लीचे मुख्यमंत्री अरविंद केजरीवाल हांकां ‘कारणां दाखयात’ नोटीस धाडल्या. प्रियंकान मध्य प्रदेशांत प्रधानमंत्री मोदी विशीं फटींचे आनी असत्यापीत नाशिल्लीं विधानां केल्ल्याचो आरोप भाजपान केल्लो.
हाचे वांगडाच आम आदमी पार्टीन (आप) प्रधानमंत्री मोदी विशीं अपमान करपी व्हिडियो सोशल मिडियाचेर घाला असो आरोप भाजपान केल्लो. खरें म्हळ्यार आपान 8 नोव्हेंबराक प्रधानमंत्री आनी गौतम अदानी हांचे विशीं व्हिडियो स्टोरी आपल्या ‘एक्स’ खात्याचेर घाल्ली. दुसऱ्या दिसा 9 नोव्हेंबराक आपान मोदी आनी अदानी हांचे फोटो घालून प्रधानमंत्री लोकां खातीर न्हय तर उद्देजकां खातीर काम करता असो आरोप केलो.
10 नोव्हेंबराक भाजपान प्रियंका आनी केजरीवाल हांचे आड वेंचणूक आयोगा कडेन कागाळ केल्ली. हांचेर वेंचणूक आयोगान 16 नोव्हेंबराच्या रातच्या 8 वरां मेरेन दोनूय फुडाऱ्यांक कारणा दाखयात नोटीस धाडल्या.
आदर्श आचारसंहितेचें उल्लंघन केल्ल्यान तुमचे आड योग्य कारवाय कित्याक करची न्हय, असो प्रस्न आयोगान दोनूय फुडाऱ्यांक विचारला. तशेंच थारायिल्ल्या वेळा भितर तुमचे कडल्यान प्रतिसाद मेळूंक ना जाल्यार ह्या प्रकरणांत तुमचें कांयच मत ना अशें मानतले अशेंय नोटीसींत म्हणलां. अशा वेळार आयोग हे संबंदी योग्य कारवाय करतले वा निर्णय घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
