भांगरभूंय | प्रतिनिधी
पणजी : अखील भारतीय विद्यार्थी परिशदेचे गोंयांतले एक आदले ज्येश्ठ फुडारी प्रा. दत्ता भिकाजी नायक आयज दनपरां सुमार २ वरांचेर पर्वरे तांच्या घरांत संवसाराक अंतरले. तांच्या मरणान फाटलीं पन्नास वर्सां शिक्षणीक आनी समाजीक वावराक ओंपिल्लें एक व्यक्तिमत्व ना जालां.
तांणी जन शिक्षण संस्थानाचे संचालक म्हूण १२ वर्सां काम केलां. पणजेच्या धेंपो म्हाविद्यालयांत ते २३ वर्सां प्राध्यापक आशिल्ले. ‘वसंत’ हो तांचो कविता झेलो. ल्हानपणा सावन तांकां शिक्षणाची आवड. स्वताच्या कर्तुत्वाचेर स्कॉलरशीप मेळोवन तांणी उच्च शिक्षण घेतलें.
गोवा विद्यापीठाच्या शिक्षण मंडळाचे, विद्यार्थी कागाळ समितीचे वांगडी, गोंय राज्य नियोजन मंडळ, गोंय शालेय शिक्षण सल्लागार मंडळ, संजय स्कुलाचे वांगडी म्हूण तांणी काम केलां. गोंय सरकाराच्याच न्हय, तर केंद्र सरकाराच्याय विवीध शिक्षणीक समित्यांचेर ते वावुरल्यात. एका काळार ते अखील भारतीय विद्यार्थी परिशदेचे तीन वर्सां उपाध्यक्ष आशिल्ले. परिशदेचे गोंय मुखेली म्हणून तांणी काम केलां. विवीध दिसाळ्यांनी ते लिखाणूय करताले. २०११ त पिरायेचीं साठ वर्सां पुराय जाल्ले खातीर तांचो भौशीक सत्कार केल्लो.
१९७५ त तांकां मिसा कायद्या खाला अटक जाल्ली. आजूनय ते समाजीक कार्यांत सक्रीय आशिल्ले. तशेंच गोंयांत वनवासी कल्याण आश्रमाचे ते जाळवणदार आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
